UMongameli Donald Trump uthi ukubulawa komunye wabakhokhela ibutho lakwele Iran eleQuds Force, uGeneral Qassem Soleimani, kunqabele ukuthi kungabulawa izizalwane zeMelika labadlelana labo.
UTrump wethule umbiko lo ngoLwesihlanu kulandela ukubulawa kuka Soleimani duzane leBagdhad International Airport.
Uthe, “Senze lokhu ngoLwesine ebusuku ukwenzela ukuvimba impi. Kumele ilizwe leIran liyekele ukubulala abantu lokusebenzisa amalwecatsha ekubulaleni uzulu. Umuntu lo wabulalisa abantu abanengi abadabuka kwele Melika, Iraq, Iran lakwamanye amazwe.
“Sizwa siziqhenya ukuthi ubudlwangudlwangu obebusenziwa lilwecatsha abusekho. Nxa abadabuka kwele Melika bengathuselwa ngizimisele ukubavikela ngazo zonke indlela.”
Ilizwe leMelika selihambise amabutho amenengi duzane lakwele Iran lapho elizabe lihlolisisa okwenzakalayo.
Abasekela uSoleimani bathi kumele ilizwe leIran iphindisele. Kulemibiko ethi uAbu Mahdi al-Muhandis, okhokhela ivuyo le Popular Mobilization Forces, ngomunye wababulelwe ngesikhathi kuhlaselwa uSoleimani.
Obona ngezomvikela kwele Iran, uMohammad Javad Zarif, uthe okwenziwe lilizwe leMelika kuveza ukuthi ilizwe leli likhuthaza ubudlwangudlwangu.