amalinks wokungena

Breaking News

Uzulu Ukhuthazwa Ukuthi Ahlolwe Ngamadokotela Ukwenzela Ukunqabela Imvukuzane Yebele


FILE - Kuhlolwa umkhuhlane webele esibhedlela. (AP)

Inyanga kaMfumfu yinyanga eyabekelwa ukuthi ibe ngeyomkhankaso wemfundiso ephathelane lomkhuhlane wemvukuzane yebele njalo iyimvukuzane ehlasela kakhulu abesifazana loba nje itholakala kuhlekana labesilisa.

Imvukuzane le ihlasela kakhulu omama asebeleminyaka engamatshumi amane loba ilakho ukuhlasela abaleminyaka engaphansi kwale. Umuntu ngokwakhe ulakho ukuthi azihlole limvukuzane, ukwenzela ukuthi ingabanjwa kusese masinya ingakaze yamemetheka emzimbeni. Iyelapheka.

Zinengi inhlanganiso ezikhangelana lemvukuzane leminye imikhuhlane. Zigoqela eye Island Hospice.

USister Nyathi osebenzela inhlanganiso le uthi, “Imvukuzane eyebele ijayeleke kakhulu ukutholakala ebantwini abaleminyaka engu40 kusiyaphezulu, kungatsho ukuthi abangaphansi abayitholi. Intwenye esithanda ukuthi abantu bayinanzelele yikuthi iyatholakala ebantwini ngosendo.”

USister Nyathi uthi abaphangisa ukuthomba kanye labomama asebama ukuzithwala yibo abasengozini enkulu yokuhlaselwa yimvukuzane yebele.

Ukudla lakho kulakho ukufaka umuntu engozini zemvukuzane.

“Eyinye into ejayelekileyo ngabantu abathomba beseleminyaka emilutshwana engakafiki twelve years, kumbe asebengena kuMenopause. Abanathayo lababhemayo labo basengozini.”

USister Ndlovu uthi imvukuzane le, izibonakalisa ngendlela ezehlukeneyo ezigoqela ukuqubuka, kanye lemithambo yegazi ebeleni. Uthi kuqakathekile ukuthi umuntu ezazi isimo sakhe khona ezananzelela nxa engabe eselawo lumkhuhlane.

“Njengomama kumele ubezazi ukuthi amabele akho ami njani, ngoba yikho lapho okuqala khona utshintsho. Ungabona sekulemithambo yegazi ebionakala ebeleni, ubone amaqhubu, irush, kumbe amaDimples ingono isingene phakathi.”

Uthi kuqakathekile ukuthi umuntu aphange ukuyazibika ezibhedlela ayethola ukwelatshwa njalo kuqakathekile ukuthola usekelo kwabemuli lokuthi umuntu agijimele ukwelatshwa.

“Uma usutholile ukuthi ule cancer kumele ugijime uye kwabezempilo. Kumele ukhankase ukhulume labemuli ukuze bakusize. Nxa kule clinic eduzane gijima bayekusiza. Siyakhuthaza ukuthi umuntu abekwazi ukuthi umzimba wakhe umi njani.”

Imvukuzane le ilakho ukuthi ingayekela ukuthathelwa amanyathelo kusese masinya icine isimemetheka emzimbeni kucine kusiba nzima ukuyelapha kodwa konke lokhu kungavikeleka nxa ingaphangiselwa ukubonakala.

Obaba labo balakho ukubanjwa yilimvukuzane lanxa ukutholakala kubo kunganeno kulabesifazane. Wonke umuntu kumele ahlale ezihlolisisa ukuthi umi kanjani emabeleni ukwenzela ukuthi aphange ayibone nxa ingathi isimhlasele.

Ngalinyanga yonke, umkhankaso wemfundiso yokulimukisa abantu ngemvukuzane yebele uyaphambili njalo kukhuthazwa ingqe ngubani ukuthi ayehlolwa ukuze kuphephiswe imphefumulo.

Udaba Esilethulelwe NguBathabile Masuku
please wait

No media source currently available

0:00 0:01:14 0:00

Facebook Forum

XS
SM
MD
LG