amalinks wokungena

Breaking News

Ukufuthelana Phakathi Kuka Chamisa loKhupe Kucaphakela Kwele South Africa, Osekumiswe Umgcinisihlalo Webandla "oka Khupe"


UMnu. Nelson Chamisa.

Ukufuthelana ebandleni le MDC-T phakathi komkhokheli waleli bandla uMnu. Nelson Chamisa lomunye wabasekeli unkosazana Thokozani Khuphe, sekuchaphakele lakumalunga aleli bandla kweleSouth Africa.

ngxabangxoza ekhona ebandleni le MDCT ngodaba lokuthi ngubani osethethe isikhundla sikamuyi umnumnzana Morgan Tsvangirai, phakathi kukaMnu. Nelson Chamisa lonkosazana Thokozani Khuphe isichaphakele kumalunga lakunkokheli zaleli bandla kweleSouth Africa.

Ukucwayisisa okwenziwe yi Studio 7 kuveze ukuthi phakathi kwenkokheli zaleli bandla kweleSouth Africa sekulokudonselana okukhulu phakathi kwalabo abasekela icele likankosazana Khuphe labasekela elika mnumnzana Chamisa.

Umbiko otholwe yi Studio 7 waqinisekiswa yilabo abangathandanga ukuvezwa ngoba bengelalungelo lokukhulumela leli bandla, ukhombisa ukuthi inkokheli zaleli bandla sezivumelene ukususa esikhundleni okwesikhatshana umgcinisihlalo weMDCT kweleSouth Africa uMnu. Chief Ndlovu, lelunga le National Executive Committee uMnu. Khaliphani Phugeni ngenxa yokuthi basekela uNkosazana Khuphe.

Kodwake uMnu. Phugeni utshele iStudio 7 ukuthi imizamo yokumisa okwesikhatshana, yisenzo samandlwane esenziwa yilabo abaswele okokwenza ngoba yena lilunga elidala laleli bandla.

Kutsho uPhugeni: “Umbuzo wakho ngingawuphendula kanje ngithi hayi angikho suspended. Akulanto enjalo. Ngabantunje abathabe kakhulu, abafuna ukukhuluma into yabo kodwake hayi ayikho into enjalo.”

Enkulumeni ake ayiqhuba le Studio 7 ngenyanga ephelileyo umnumnzana Phugeni wakubeka kwacaca ukuthi ngokomthetho wesisekelo sebandla lakhe unkosazana Thokozani Khuphe nguye okufanele athathe isihlalo sokukhokhela leli bandla hatshi umnumnzana Chamisa.

Istudio 7 ikhulume lobona ngokuqhutshwa kwenhlelo zebandla leMDCT kweleSouth Africa umnumnzana Trust Ndlovu yena ongathandanga ukuphawula ngokuthi ababili laba sekuvunyelwene yini ukuthi bamiswe okwesikhatshana kumbe hatshi.

Loba kunjalo umnumnzana Ndlovu uvumile ukuthi kukhona ukudonselana kodwa wathi bona njengeviyo laleli bandla kweleSouth Africa basekela uMnu. Chamisa.

“Yebo liqiniso ukuthi kulabanye bethu abathanda ukungahambisani lathi, le MDCT, lemigomo yeMDCT. Bayakhuluma kumaphephandaba, bayakhuluma lakumedia. Asikho isidingo sokuthi baze benze umsindo, baze benze okunye kungathi bafuna ukuba lodlakela,” kutsho uNdlovu.

UKudabuka phakathi kwenkokheli zaleli bandla okukhanya kuqhubekela phambili sekulethe ukudana kumalunga aleli bandla labantukazana abebefake ithemba labo lombuso okhululekileyo ebandleni leMDCT.

Isizalwane seZimbabwe unkosazana Nomathemba Ndlovu uthi kuyadanisa ukuthi inkokheli zeMDCT azikuboni ukuthi ngenxa yothando lwezikhundla sebechithe ithemba leminyaka, ngemva kokuthi bebanengi ababulawayo, batshiselwa imizi abanye basala beyizigoga ngenxa yokusekela imizamo yaleli bandla yokuletha inguquko eZimbabwe.

“Mina into engiyibona isenzakala kuMDCT between uChamisa loKhuphe, angiyiboni ukuthi iyasebenza. UChamisa bekumele ayekele uKhuphe athathe izintambo njengoba ekade enguVice wakuqala. Lokhu osekusenzeka thina asikwazi ukuthi kuhamba njani and asikuboni ukuthi kuyinto enhle. Sesibona engathi yikuncindezelwa kwabantu besifazana kuPolitics,” kutsho uNdlovu.

Abanengike bathi kusobala ukuthi isiphetho sokudonselana kukaMnu. Chamisa loNkosazana Khuphe siyaphetha leli bandla selidabuke phakathi ngokusemthethweni okuyinto abathi izahle iphawule obala ukuthi iphupho leMDCT lokubusa ilizwe selihle latshabalala.

Kodwake abanye bathi kabalahli mbeleko ngokufelwa njengoba iZANU pf layo kukhanye izabe isidabuke phakathi laphakathi ngesikhathi kuyiwa ekhethweni.

please wait

No media source currently available

0:00 0:03:45 0:00

Facebook Forum

XS
SM
MD
LG