Abantu emaphandleni bathi sebephila nzima ngenxa yomnotho ogugudeke okokuthi kabenelisi ukuthola imali yokuthenga ukudla njalo lezifuyo zabo kazisathengiseki ngoba sezicakile njengoba kungasela amadlelo lamanzi.
Abanye baswela wona umfushwa wokunika immuli zabo Sebesehluleka lokuthola ukudla kanye ngelanga.
Abantu abahlala eKezi, eTsholotsho, Lupane, Bulilima, Mangwe, Beitbridge, Gwanda lezinye indawo eMatabelelend abakhulume leStudio 7 bathi isimo esibi somnotho kanye lokoma okudalwe yikungani kwezulu kwenza ukuba behluleke khona ukuthola isitshwala kumbe ilambazi kanye ngelanga.
Bathi behluleka lokuthengisa inkomo, imbuzi, amadonki lezinye izifuyo ezizilentengo ephansi ngenxa yokuphela kwamadlelo. Inkomo okwamanje bathi zicake okokuthi eyodwa ecakileyo ithengwa ngamadollar eMelika angamakhulu amabili – US$200 kulokuthi ibize amakhulu amane amadolar – US$400 kusiya phezulu.
UMnu. Thembelani Moyo ohlala eKwarai eLupane uthi kuyesabeya okwenzakala esiqintini sakibo.
UMnu. Clarence Tshuma ohlala eNatisa eKezi laye uthi kuyethusa okubhekane lozulu.
Sibi isimo sendlala lokugugudeka komnotho eTsholotsho. UMnu. Mduduzi Sibanda ohlala esigabeni esiphansi kwenduna uNgqoya uthi babambe owangaphansi ngokuswela ukudla lokunye.
Abacubungula ezomnotho bathi isimo somnotho kasisoze siguquke uma uhulumende engaguqulanga indlela aphethe ngayo ezemithetho lezombusazwe. Kodwa uhulumende uthi uzama ngamandla wonke ukuba alungise imithetho yamabhizimusi njalo lokudinga ukudla kwabalambayo.
Forum