Ele Zimbabwe limele lithole isivuno sama tonne ayizigidi phose ezimbili-1.8million tonnes, omumbu ngomnyaka ukuze abantu bethole ukudla okwenelayo.
Nyakenye izulu lijume abantu lana ngesikhathi esingayisiso. Abalimi bendawo ezivele zingani izulu elinengi bahlaselwe kanzima yindlala ngalumumo wokuguquka komkhathi.
Umnumzana Evans Nyoni olima ese Nkayi ku ward 23 uthi wenelise ukuzobukisa akulimayo ku showa yabalimi eye Harare Agricultural Show yalonyaka ngehloso yokuthi athole ulwazi lwangalezi nsuku ukuze athole isivuno esingcono.
"Esikulimayo kakhulu ngumumbu ,umumbu lamabele,amabele lonyauthi.Lonyaka ngokungani kuhle kwe zulu hayi kunzima kuhamba lapha lalaphayana kwezinye indawo kuncono kodwa kwezinye indawo hayi indlala ikhanya izabatshaya .Mina ngilapha ngoba engikuqakathekisileyo yikuzofunda ngoba engikwaziyo yikuthi ngizahamba sengilolwazi engizaluphathela abanye."
Umnumzana Tom Ncube ovela eMguza ward 9 nge zansi yele Mandebeleni uthi ulwazi lokulima lwangalezi nsuku luqakathekile kakhulu lakubalimi basemaphandleni.
"Khathesi ngikhuluma kanje ngibuye lomumbu ama variety amathathu lamabele imihlobo embili ngasengifaka lama legumes.Imihlobo le ngile bhabhadla ngizokuba le Silwane SC637 le Orange maize UZ5284 .Lonyaka Ibhabhadla mina ngililime 80% njalo lingenzele kuhle kakhulu ukwedlula umumbu wonke engangiulimile."
Amabhizimusi aphatheke kwezokulima agoqela abathengisa inhlanyelo abenjenge Seed-Co aphana amacebo labalimi laba kulumbukiso.
Umnumzana Nyoni uthi abalimi bemaphandleni kumele basebenzise ulwazi olunje njalo besebenzelane labalimisi kulokusebenza bebodwa:
"Ngithi abalimi kabasondele kakhulu kubalimisi ngoba umlimisi engumuntu ka hulumende oncedisa abantu esigabeni, ngoba kunje khathesi kuyaqamuka nje umkhuhlane kungaba yikhonokho o stock borer nxa umlimisi engekho ongakuphathisa ngubani."
Okweminyaka emibili ilandelana ngo 2015 lo 2016 izulu kalinanga kuhle ilizwe lathola nje ama tonne omumbu edlula kancane inkulungwane ezingamakhulu amahlanu -511 000 tonnes, lacina libajwa ngamandla ukuthenga umumbu kwamanye amazwe.
Kulandela usekelo lwenhlanyelo lemvundiso kuhlelo lwe Command Agriculture lolwe Presidential Input Scheme ilizwe latshaya inala ngomnyaka ka 2016/17 lathola ama tonne edlula izigidi ezimbili -2.1million tonnes omumbu, kodwa lonyaka izulu kalisanga kwezinye indawo.
