amalinks wokungena

Breaking News

'Ukukhwela Kwembhadalo yamaToll Gates Kuzabangela Ukukhuphuka Kwentengo Yezinto'


Zimbabwe toll gates

Abenhlanganiso yezisebenzi, iZCTU kanye lozulu makhaza sebesole kakhulu ukukhwela kwemali ebhadalwa ngabatshayeli bezimota entubeni zama-toll gates besithi kuzabangela ukukhwela mahlayana kwentengo yezinto ezitolo.

Ugatsha lweZimbabwe National Roads Administration (Zinara) lukhweze imbhadalo yama-toll gates ngesilinganiso sokwedlula ikhulu lamatshumi amahlanu ekhulwini, 150 percent.

Imota ezincane ebezibhadala amadola angamatshumi amane lanhlanu, Z$45, sezizabhadala ikhulu lamadola elilamatshumi amabili, Z$120.

Izimota eziphakathi laphakathi ebezibhadala amadola ayisikhombisa, Z$70, sezizahlawula amakhulu amadola phose amabili, Z$180.

Imbhadalo yamabhasi yona ikhwele isuka kuZ$90 yaya kuZ$240.

“Kutsho ke ukukhuphuka kwe-transportation, okuzabangela ukuthi izisebenzi zithwale nzima nxa zisiya emsebenzini. Impahla ezihanjiswa ngomgwaqo lazo zizakhuphuka,” kutsho unobhala jikelele weZCTU uMnu Japhet Moyo.

Amazwi kaMoyo agcizelelwe ngumsekeli wesikhulumeli sebandla leMDC Alliance uMnu Felix Magalela Mafa Sibanda.

“Kuyinxwala njalo kungumbhedo owenziwa ngabantu abangananzi abantu abampofu,” kutsho uMnu Mafa.

“Izimota zabantu abakuhulumende lamakhomishini lama-judge lezinduna lamaCIO, ezephalamende zonke lezomota zeZanu PF vele kazibhadali zidlula zitshaya umchilo.”

Kodwa ilunga leZanu PF uMnu Believe Gaule uthi lanxa abantu bekhala ngoba bevele bengelamali, imbhadalo yama-toll gates le ikhwele kancane nxa kukhangelwa imali yeMelika.

“Nxa isikhwele ngeRTGs yaya kuZ$100 and something, isiphose ibe sesilinganisweni leUS$1 and some cents. Isibuyele khonaphana eyayivele ikhona ngedola leMelika,” kutsho uMnu Gaule.

Isikhulumeli seZinara uMnu Tendai Mugabe uvumelane loGaule esithi bakhweze limbhadalo ngoba imali ekade beyithola ibingeneli inhlelo zokulungisa imigwaqo.

Kodwa uzulu uthi okudanisayo yikuthi imigwaqo imagodigodi njalo akukhanyi ukuthi imali ehlawulwa ngabatshayeli iya ngaphi.

Imbhadalo yokubhalisa imota, iregistration layo ikhwele ngesilinganiso esikhulu.

Kusenjalo, uMongameli Emmerson Mnangagwa, eloba enkundleni yeTwitter, uthe ukuze umnotho weZimbabwe uvuselelwe kumele kuze abatshali bezimali.

Kodwa ingcwethi kwezenotho uMnu Reggie Shoko uthi kunengi okuxotsha abatshali bezimali laba okugoqela inkohlakalo.

“Nxa ulikhangele ilizwe lethu lilizwe elingani alilamthetho, izinto zingavuka zitshintshiye yiloba yisiphi isikhathi,” kutsho uMnu Shoko.

“Kulendaba yama-property rights. Ungananzelela sesileminyaka engamatshumi amabili silokhe sisilwa ngendaba yamasimu, noma sisithi sesayiqeda kodwa abantu bayavuka bethathelwe amasimu. Into yamasimu kumele siyilungise layo into okuthiwa yi-policy consistency.”

Amazwi kaMnu Shoko agcizelelwe nguMoyo.

“Ama-fiscal policies atshontsha nsuku zonke. Eminye imithetho yakhona imenyezelwa kuma-political rallies,” kutsho uMnu Moyo.

Sesiside isikhathi uMnangagwa ebhoda ngamazwe omhlaba ezama ukuhuga osomabhizimusi bakwamanye amazwe kodwa engaphumeleli.

please wait

No media source currently available

0:00 0:05:00 0:00

Facebook Forum

XS
SM
MD
LG