Ibandla leZanu PF lithi liyajabula ukuthi sokulabantu ababotshwe ngamapholisa abanakanelwa ukuthi baphosa ibhomba eWhite City Stadium koBulawayo ngeviki ephelileyo lapho okwakulomhlangano webandla leli.
Lithi ababili laba, uMnu. John Zulu loMnu. Douglas Musekiwa, kumele bathoniswe ngemfanelo ukwenzela ukuthi kuphumele egcekeni isehlakalo lesi esabulalisa abantu ababili kwalimala abanengi.
Kasenelisanga ukukhuluma labazamele uZulu loMusekiwa emthethwandaba abamiswe phambili kukamantshi eWestern Commonage koBulawayo ngoMgqibelo besetheswa amacala okuba ngamalwecatsha, ukuzama ukuguqula uhulumende osemthethweni lokunye okufanayo.
Abalimala kusehlakalo lesi bagoqela umsekeli kamongameli, uMnu. Kembo Mohadi, uNkosikazi Mary Chiwenga, uNkosikazi Oppah Muchinguri Kashiri lezinye iziphathamandla zebandla leZanu PF.
UMnu. Joseph Tshuma, omele iPelandaba-Mpopoma edale lephalamende njalo okudale leZanu PF Central Committee, uthi kuyajabulisa okwenziwa ngamapholisa.
Kodwa-ke abalwela ilungelo likazulu bathi kukhanya engani amapholisa abophe abantukazana hatshi amalunga ecele leZanu PF elikhokhelwa nguNkosikazi Grace Mugabe abacatshangelwa ukuthi benza isehlakalo lesi.
UMnu. Charles Nyoni, ilunga leOccupy Africa Unity Square elikhokhelwa nguMnu. Itai Dzamara oseleminyaka emithathu wathunjwa ngabantu abangaziwayo, uthi kuyamangalisa okubotshwa kuka Zulu loMusekiwa.
