Ukungabikhona kwamapolisa ezitaladeni sokubangele ukuqansa kwenani labesifazane abaphila ngokuthengisa umzimba abazithola bebanjwa inkunzi.
Kuleminye njalo imibiko eke yethulwa yinhlanganiso ye National Aids Council ngenyanga edluleyo ethi amasotsha abamba ngamandla abesifazane abphila ngokuthengisa umzimba ukuthi baye emacansini labo kungela mbadalo.
Kodwa isikhulumeli senhlanganiso ye Sexual Rights Centre, uMnu. Mojalifa Mokoele, utshele iStudio Seven ukuthi mpela inani labaphila ngokuthengisa imizimba abaqilebezelwayo kumbe ukubanjwa inkunzi liyaqansa.
Siqale ngokumbuza ukuthi liqiniso yini ukuthi amasotsha abamba abathengisa imizimba ngamandla ukuya emacansini njengembadalo yokususa owayengumongameli, uMnu. Robert Mugabe esihlalweni?
“Aaa, loludaba saluzwela emaphepheni njengomuntu wonke. Isiqiniseko sakhona kumbe iqiniso asingeke sibelazi ngoba asisalulandelanga loludaba ukuze sibekwazi ukuthi kuyenzakala na kumbe ngabo nozindaba abafuna nje ukuthengisa amaphepha,” kutsho uMokoele.
Wengezelele esithi esikhathini esinengi omama abathengisa imizimba nxa behlukumezekile bayeza kibo bezodinga uncedo.
“Khona ukuhlukunyewa kuyenzakala ngoba inhlanganiso engiyisebenzelayo yonale sisiyafika ku June ilandelele amacala afika 15,” kutsho uMokoele.
Uthi kulabanye abenelise ukuthonisisa amacala abo ngemva kokudingelwa abammeli abanye njalo bacina bekhulumelana lababahlukuluzile ngaphandle komthethwandaba.
