UMongameli Emmerson Mnangagwa usethembise uzulu ukuthi yena lohulumende wakhe bazasebenza gadalala ukuvuselela umnotho welizwe.
Izisebenzi sezikhuthazwe ukuthi lazo zisebenze gadalala, ikhefu labaphathintambo bakahulumende limisiswe njalo uMnangagwa ubonakale esebenza ngeSonto okwakungenizwa ngulowo amelamayo, uMnu. Robert Mugabe.
Sixoxe lengcwethi ecubungula ezombusazwe, uMnu. George Mkhwananzi, olilunga njalo lebandla le PDP, saqala ngokumbuza ukuthi kambe inyathelo likaMnangagwa alisoze libe yize nje kuphela?
“Kuzophelela emoyeni njengezithukuthuku zenja ngoba abantu bona laba asebezenza abakhutheleyo manje yibo kanye abausekela eminyeka engu 40 edluleyo iZanu PF ibusa bebevele bephethe lawomandla, lamacebo lamasu ukuthi sebengaphendula ilizwe esalaba lugwadule litshintshe libe yilizwe elivundileyo elingakwazi ukukhiqiza ukudla okungadliwa ngumuntu wonke. Akukho okutsha abangakwenza okutsha. Lokho bakwenzela ukhetho lolu selulunguze ngekhala,” kutsho uMkhwananzi.
Wengezelele esithi isikhathi sokuthi uzulu abe kwazi ukuthi uMnangagwa uzafeza na inhlelo zakhe sifitshane kakhulu ngoba lenyanga eyodwa kayikeneli esesihlalweni.
Uthi nxa esithi kasoze abhode umhlaba, efequza njengalokho okwakusenziwa nguMugabe, isikhathi sisesifitshane ukuthi kubonakale lokhu.
"Yebo kube khona ukunciphisa lapha lalaphaya kwezinye inhlelo zokusebenzisa imali kodwa lakhona asikukholwa ukuthi esikubona ngamehlo yikho okwenzakala impela ngoba kuyasuswa ebusweni babantu konke kade kusolwa ukuze abantu bajabule kodwa lokhu kusenziwa okunye okungalunganga ngasese kuqhubekela phambili inhlelo ze Zanu,” kutsho uMkhwananzi.
