amalinks wokungena

Breaking News

Ukusilela Kwamanzi Kungabangela Ukumemetheka Kwegciwane leCoronavirus Emaphandleni


Itanka Evuzayo eBethel eGwanda
Itanka Evuzayo eBethel eGwanda

Izakhamizi zeNamba 2 eBethel eGwanda South zikhala ngodubo lokusilela kwamanzi kulandela ukudabuka kwetanka abalisebenzisayo, osokudale ukuthi zibuthane ngobunengi bazo lapho zikhelela, okuzifaka engozini yokuhlaselwa ligcikwane leCorona Virus.

Izakhamizi esixhumane lazo lapho ezikhelela khona amanzi zithi ukuvuza kwetanka lokhu kudala ukuthi zihlale isikhathi eside zilindele amanzi ngoba engasaphumi kakhulu kuthi abanye sebesikha edamu ngenxa yaloludubo.

Inhlanganiso yeAfriCare, isebenzisa uncedo lweUSAID yafaka impompi ezidonsa amanzi ngamandla elanga iSolar nyakenye kodwa udubo oselukhona yikuvuza kwetanka yamanzi osekudale ukuthi amanzi aphume kancane.

UNkosikazi Duduzile Ndlovu ongumgcinisihlalo wekomidi ekhangele lesisikotsho uthi sekudingakala ukuthi kuntshintshwe itanka lamanzi leli eselidabukile.

Amazwi akhe agcizelelwe nguNkosikazi Happy Sibanda othi udubo lwamanzi beselunganeno esigabeni sabo kodwa ukudabuka kwetanka lamanzi lokhu sekubalethele ubunzima.

Udubo lwamanzi emakhaya aseGwanda South lubhahile endaweni ezinengi njalo lukhangelelwe ukuthi lusabalale kunyanga ezimbili ezilandelayo ngenxa yokungani kuhle kwezulu.

Kusenjalo abazali abalabantwana abafunda ezikolo zemakhaya bathi uhulumende kumele aqale alungisise izikolo zemaphandleni zingakavulwa ukuze kwenqatshelwe ukumemetheka kwegciwane leCorona Virus.

UNkosikazi Thando Mauba oweMantanangombe uthi kunengi okusilelayo kulezizikolo okudingwa ukuthi kukhangelwe phambilini kokuvulwa kwazo.

Amazwi la asekelwe nguNkosikazi Julieth Nkiwane umqondisi wenhlanganiso yabomama bemaphandleni eye Women Development Association of Zimbabwe iWODAZ othi kuzakubanzima lakubabalisi ukuthi bafundise.

Ekhuluma esesikolo seMtshabezi izolo, umphathintambo obona ngezemfundo uMnu Cain Mathema uthe uhulumende kakabeki ilanga lokuvulwa kwezikolo esithi lokhu kuzakuya ngemizamo azayithatha ekulwisaneni legciwane leCorona Virus.

Uphinde wathi izikolo zonke kuzamele zibe lamanzi aphuma empompini phambilini kokuvulwa kwazo.

Inani lalabo abahlaselwe yigciwane leCorona Virus liya liqonga mihla ngemihla njalo inengi labazali lithi lesabela ukuthi nxa izikolo zingavulwa kuyabe kuyikufaka abantwababo engozini.

XS
SM
MD
LG