Abesifazana abangamatshumi amabili lasitshiyagalombili sebathole izicoco zokuphutsha izifundo zabo zokuqhuba amabhizimusi.
Izifundo lezo bebezenza lenhlanganiso yePROWEB zibizwa ngokuthi yi-Virgin Unite Business Women’s Training and Mentoring Programme in Entrepreurship.
Omama abanengi sebeqalile imizamo yokuthi labo babe ngosomabhizimusi okwenza ukuthi labo benelise ukuzimela banakekele lemuli zabo. Uhlelo lwePROWEB lujonge ukuthuthukisa omama njalo lubanikeza ulwazi lamacebo okwenza ibhizimusi.
Obemele umqondisi wenhlanganiso yePROWEB unkosikazi Oppilia Mubaiwa uthe izifundo lezi bazenzela ukuthi omama benelise ukusebenza emabhizimusini aba bethole inzunzo njalo basebenze ngobuqotho.
Omunye wababalisi abakade befundisa omama laba uNkosikazi Nomathemba Ndlovu uthi ukholwa ukuthi umuntu kumele ahlale ethuthukisa ulwazi lwakhe njalo uhlelo lolu lusiza omama kakhulu. Ukhuthaze omama ukuthi baqhubekele phambili njalo bakhuthalele ukuzithuthukisa. Yena ungomunye owenza izifundo lezi kodwa khathesi usefundisa abanye ukubhala uluhlu lokuhlela ibhisimusi, iBusiness Plan.
Abohlangothi lukahulumende olwe Small and Medium Enterprises bethule umbiko emkhosini lo bethi bayazithakazelela kakhulu inhlelo ezithuthukisa abantu njalo uhulumende omutsha ufuna ukuthi omama bathole amathuba kwezomontho. Bathi njalo kulemali esezibekwe eceleni ezenhlelo zentuthuko ebhanga elikhulu lelizwe ele Reserve Bnak of Zimbabwe kanye lamakampani anjengabo Homelink okuyimali abesifazana labo okumele bayifinyelele.
Omunye wabaphutshe izifundo uNkosikazi Mariyeti Mpala uthe izifundo lezi zimphathise kakhulu ngoba ngesikhathi eqala izifundo wayesefuna ukuvala ibhizimusi lakhe kodwa khathesi ngenxa yolwazi lokuxhumana labantu abalembono ehlukeneyo usephumelele njalo usesebenza lenhlanganiso ezimbalwa.
Osakhulayo uNkosikazi Mandisa Magonya, onguye oncinte bonke ezifundweni lezi uthe ujabule kakhulu ngempumela yakhe ethi uhambo lolu belunzima kodwa wazimisela ukuthi uzaphutsha. UMangonya wenza ibhizimusi lokulungisa amacici kanye lezigqizo zentanyeni lokunye okucecisa omama.
Obephathisa abafundi ngekubacebisa ezifundweni zabo uNkosikazi Sarah Munemo uthe laye waqala efunda ePROWEB kodwa wathi esephutshile waqala ukufundisa njalo ekhuthaza abanye.
Omama abanengi basalele emuva kakhulu kwezamabhizimusi leminye imisebenzi yenotho, inengi labo lenza amabhizimusi amancinyane afana lokuthengisa amatamatisi lokunye, kodwa kuhlelo lolu inengi labomama sebephatheka kumabhizimusi amakhulu alesizotha.
