Akula bandla elilodwa elingathi yilo elinqobayo lithatha izihlalo zonke zamalunga edale lephalamende eMatebeleland North. Amabandla avame ukuthola izihlalo ngele Zanu PF, kanye lele MDC-T kuthi kwezinye izikhathi amalunga azimeleyo.
Kukhetho lokucina olwenziwe ngomnyaka ka 2013 ibandla elibusayo eleZanuPF lathatha izihlalo eziyisikhombisa phakathi kwezilitshumi lantathu.
Ohlaziya ezombusazwe umnumzana Discent Collins Bajila uthe isabelo lesi asikaze sibuswe libandla elilodwa kodwa sihlala sihlanganise amabandla.
UBajila ugcizelele wathi iziqinti ezinjengeTsholotsho, iMguza leBubi azikacaci ukuthi zizahamba kanjani ethi abajwayele ukunqoba kuzo lezo indawo abakho njalo abancintisi kulolukhetho. Labo abangekhoyo ngowaxotshwa kuhulumende umnumana Jonathan Moyo kanye lo mnumzana Obert Mpofu oveze ukuba akasoze ancintise kukhetho lwalonyaka. UBajila uthi isiqinti seBinga sivame ukuvota ngokufanayo minyaka yonke.
Omunye njalo ohlaziya ezombusazwe umnumzana Patron Khutshwekhaya Nketha uthe isabelo seMatabeleland North silabantu abalutshwana ababhalisele ukuvota lonyaka, ngakho asila mandla okuguqula impumela yokhetho ethi kodwa nxa kukhangelwa ukhetho lokudinga umongameli iMatabeleland iqakathekile kakhulu.
Umnumzana Mark Ndlovu onguProvincial Elections Officer we Matabeleland North uthi isabelo seMatabeleland North silabantu abayisilanganiso esingaphezu kwenkulungwane ezingamakhulu amathathu 321 653.
Umnumzana Thembelani Ncube uthe isabelo seMatabeleland silakho ukuguqula impumela yokhetho ethi bathanda ukuvota ngokufanayo. Wengeze njalo ethi kukhetho lolu esiyakulo kunzima ukutsho ukuthi ukhetho luzahamba njani ngoba abantu bematabeleland badabuke phakathi ngenxa yamabandla ezombusazwe ancintisayo.
Isabelo seNyakatho yamaNdebeleNI silezigaba ezilitshumi lantathu ezibalisa Binga North, Binga South, Mguza, Bubi, Lupane East, Lupane West, Nkayi South, Nkayi North, Tsholotsho North, Tsholotsho South, Hwange East, Hwange Central le Hwange West. Ukhetho lwalonyaka lukhangelelwe ukuba khona phakathi kwenyanga kaNtulikazi loNcwabakazi.
