amalinks wokungena

Breaking News

Abaphila Ngokuthengisa Bacatshulwa Ngasebekuzwe Ngendawo yeEgodini Mall


Egodini Mall

Izakhamizi zedolobho lakoBulawayo eziphila ngokuthengisa eGodini sezicaphukile kulandela ukuba ngemva kokwakhiwa kwendawo yamavinkili lamabhizimusi iGodini Mall.

IGodini Mall ikhangelele ukuqala ukwakhiwa ngenyanga ezayo kaZibandlela, izathi ingaphela ukwakhiwa kuzakuba lesilindo samabhasi lezimota ezincane, amavinkili ahlukeneyo kanye lezitolo ezincane zabathengisa bezimele eziyinkulungwane elekhulu.

UMqondisi weTEARRACOTTA, uMnunzna Thulani Moyo, inkampani eyiyo ezakwakha iGodini Mall uthe konke sekuhleliwe njalo bazaphangisa ukwakha ukuze abaphila ngokuzisebenza bethengisa bengalahlekelwa libhizimusi.

Ukwakhiwa kweGodini Mall kukhanya kuzaswelisa abanye abathengisayo indawo yokuthengisela. UMnunzna Peter Sibanda othengisela eGodini manje uthe ukuze kungabi lomsindo kumele kuqale ukuphiwe abahlali bakoBulawayo njalo bebebebhalisile okusemthethweni ukuthi bebevele bethengisela eGodini iMall ingakakhiwa.

Olwela amalungelo oluntu, uMnunzna Effie Ncube uthe kuqakathekile ukuba ikhansili yedolobho lakoBulawayo ibelendlela ecacileyo yokunikeza abantu indawo zokuthengisela njalo kungabi lobugwelegwele kanye lokungenela kwabezombangagzwe ngoba yikho osekubulele ilizwe.

UMqondisi wenhlelo eBulawayo Vendors Traders Association, uNkosikazi Debra Mkasa, uthe bona ezombangazwe abangenelani lazo bazakupha abantu abangamalunga abo njalo abakade bevele bethengisela eGodini ngoba amalunga abo avele ayaziwa lasekhansilini.

Omunye njalo omele abantu abathengisa bezimele ngaphansi kwenhlanganiso yeStreet Wise Vendors Association, uKhansila Edward Manning uthe akusibo bonke abantu abazabuyela ukuthengisela eGodini Mall ngoba ekupheleni kokwakhiwa kwevinkili leli, abanye babantu bazaqhatshwa kundawo ezehlukeneyo kuthi labo abazasala bazadingelwa ezinye indawo zokuthengisela kodwa vele abathengisa okusemthethweni ngeke baswela indawo zokuthengisela.

EZimbabwe imisebenzi emankampanini amakhulu ayikho ngoba savala ngenxa yokuma manzonzo kwezomnotho lombangazwe. Inengi labantu seliphila ngokuthengisa njalo inengi labantu lithengisela eGodini duze lesilindo samabhasi ngoba kulabantu abanengi kuleyondawo. Ukwakhiwa kweGodini Mall abantu bayakwamukela kodwa bathi kungabatshiyi endlaleni.

please wait

No media source currently available

0:00 0:03:37 0:00

Facebook Forum

XS
SM
MD
LG