amalinks wokungena

Breaking News

Ukwehla Komkhuhlane weCovid-19 Kwele Botswana Kunika abeZimbabwe Ithemba


Coronavirus

Abanye babadabuka eZimbabwe asebehlala kweleBotswana bathi balethemba lokuthi bazaqeda umnyaka besesimeni esingcono kulandela ukwehla kakhulu kwenani labantu abatholakala beleCovid-19.

Noma nje bekungumnyaka onzima, kulenhlansi yokuthi ikhefu lalonyaka lekhisimusi lingabangcono ngemva kokuvulwa kwezigaba zomnotho ezinengi kweleBotswana, lapho okulenani eliphezulu labeZimbabwe abaphephela khona.

Ukuqhamuka kweCovid-19 kwenze impilo yabanzima kwabokuza emazweni amanengi, okugoqela abeZimbabwe, inengi eliphume elizweni lisiyadinga amadlelo aluhlaza.

ICovid-19 isibone ohulumende abanengi benakekela kakhulu izazalwane zazo, kutshiya abokuza phandle kwenhlelo ezinengi.

Kodwa abeZimbabwe kweleBotswana abafana lomnunzana Mkhululi Moyo, yena ohlala eGaborone, bathi noma nje umnyaka ube ulukhuni, ulakho ukuphela ngendlela ethembisayo.

“Isimo esikhona khathesi siyathembisa ikakhulu sikhangelane lesimo sekhisimusi. Kungaqhubeka inani labantu abaleCovid lisehla, sibona lemigoqo ngitsho leyokuhamba iyekethiswa.”

UMoyo ukhala ngokuthi ngabe kuyakhulunyiswana phakathi kukahulumende weBotswana leZimbabwe ukuze abantu bechaphe kuhle imngcele.

Inengi labeZimbabwe lilesikhathi lingenelisi ukuyafika ekhaya ngenxa yemigoqo eyafakwa lokhe kwaqhamuka umkhuhlane weCovid-19.

“Ngibona isimo esikhona sihle kakhulu, sinathisa amanzi. Ungathi emngceleni kungaba lobubelo, ikakhulu sikhangele kucele leZimbabwe ngoba ngapha kweleBotswana kuyathembisa. Sikhangele isikhathi sekhisimusi kolokwesabela ukuthi isimo singabuya sintshitshe futhi, kodwa sikhuleka kuzaba ngcono siyebona abazali lezihlobo.”

Umnunzana Andreas Sibanda laye uthi ukwehla kwenani labantu abatholakala beleCovid-19, kubanika ithemba endaweni ezinengi.

“Kusiphe ithemba lokuthi siqale njalo ukudinga imsetshezanyana, ngoba uhulumende usuyekethisile iziqondiso zeCovid-19. Ngomnyaka odluleyo, asenelisanga ukuyafika ekhaya, ngakho lonyaka kusipha ithemba lokuthi sizakwenelisa.”

EleBotswana belithwele amagabha avuzayo enyangeni ezisanda kwedlula, umkhuhlane weCovid-19 usuvuke eseganga.

Kodwa kuyonale iviki ilunga lekhomithi ecebisa uhulumende ngesimo seCovid-19, udokotela Mogomotsi Matshaba ubike ukuthi inani labatholakala belomkhuhlane lo, liyehle kakhulu emavikini asanda kudlula.

“Ilizwe lonke selikumbala oluhlaza. Okuqakathekileyo yikuthi sinanzelele ukuthi besekusikhathi singakantshintshi imbala yethu, lonke untshintsho lwenzakale phakathi kwesikhathi lokhe sacina ukuntshintsha imbala yethu.”

Kusenjalo eleBotswana selifake isiqubu kunani labantu asebethole ijekiseni yeCovid-19 kugoqela labeZimbabwe abahlala kulelozwe.

Kuyonale iviki besekuhlatshwe abantu abaphose babe ngamatshumi amabili ekhulwini (17.4%) asebethole amajekiseni amabili.

Facebook Forum

XS
SM
MD
LG