amalinks wokungena

Breaking News

ULoga Uthembisa Izimanga Kumncintiswano Wenkezo yeAfcon


U-Zdravko Logarusic umqeqetshi weqembu elimela isizwe emdlalweni wenguqu, elamaWarriors

Umqeqetshi weqembu labesilisa elimela ilizwe le Zimbabwe emdlalweni wenguqu elama Warriors uZdravko Logarusic uthi iqembu leli lingedlula kusigaba sezibaya kumncintiswano we Africa Cup of Nations ngomnyaka ozayo nxa lingaqhuba amalungiselelo alo ngemfanelo.

Ekhuluma mayelana lempumela yokuhlelwa kokuba amaqembu azadlala njani kumncintiswano we Africa Cup of Nations ngomnyaka ozayo, umqeqetshi weqembu lama Warriors uLogarusic uthe ebholeni lakulezinsuku akulaqembu okungathiwa liqine okwedlula amanye kumbe okumele lesatshwe ngamanye.

“Kusibaya sethu ungakhangela ngokwephepha uyakuthi iqembu le Senegal yilo elizanqoba kodwa ibhola lidlalwa enkundleni hatshi ephepheni. Kuzamele siqedelane enkundleni.

Kuhle njalo ukuba umhlubulo we COSAFA umelwe ngamaqembu amabili athi ele Zimbabwe kanye lele Malawi okokuthi mhlawumbe elinye lakhona lingadlulela kusigaba esilandelayo esomncintiswano okungaba yinto enhle kakhulu,” kutsho uLogarusic.

Iqembu le Zimbabwe lifakwe kusibaya sika Group B ndawonye le Senegal, iMalawi kanye le Guinea. ULogarusic uqhubekele phambili wathi yena okuzadala umehluko ekuphumeleleni kweqembu le Zimbabwe yikuba lizaqhuba njani amalungiselelo alo awokuyadlala kwele Cameroon.

“Okumele sikwenze njengeqembu leZimbabwe yikulungisa amaphutha abe khona kumncintiswano eyadlulayo. Kumele siqale amalungiselelo ethu masinya ukuze kuthi kufika imidlalo sitholakale singabantu asebehlome baphelela.

Sesiside isikhathi sisithi silabadlali abezinga laphezulu njalo ngokubona kwami lesi yiso isikhathi esokuthi baveze ikhono labo. Ngilethemba elokuba sizamangalisa abanengi abangakholelwa kithi,” kutsho uLogarusic.

Kusibaya sika Group A kuleqembu le Cameroon okuyilo eliqoqa umncintiswano we Afcon 2021, kule Burkina Faso, kule Ethiopia kanye le Cape Verde.

Kusibaya sika Group C kuleqembu le Morocco, kule Ghana, kule Comoros kanye le Gabon. Kusibaya sika Group D kuleqembu le Nigeria, kule Egypt, kule Sudan kanye lele Guinea Bissau.

Kusibaya sika Group E kuleqembu le Algeria, kule Sierra Leone, kule Equatorial Guinea kanye lele Ivory Coast.

Kusibaya sika Group F kuleqembu le Tunisia, kule Mali, kule Mauritania kanye lele Gambia.

Amaqembu azaphutsha esendaweni ezimbili eziphezu kwengalane yemiklomelo yiwo azadlulela kusigaba esilandelayo esomncintiswano ndawonye lamaqembu amane azaqeda imidlalo yezibaya elemiklomelo ethe thuthu kulawo azabe ehlezi endaweni yesithathu.

Umncintiswano we Afcon 2021 ukhangelelwe ukudlalwa ekuqaleni komnyaka ozayo kusukela mhla ziyithoba munwe munye kunyanga kaZibandlela kusiyafika mhla ziyisithupha kunyanga ka Nhlolanja

Facebook Forum

XS
SM
MD
LG