Isikhulumeli seMDC Alliance uNkosazana Fadzayi Mahere uzamiswa emthethwandaba namuhla lapho umantshi azakwethula khona isinqumo phezu kwesicelo sakhe sokuthi inkantolo ilahle icala abhekane lalo.
UMahere wetheswa umlandu wokuqamba amanga ngokwethula umbiko enkundleni zokuxhumana owawusithi kulepholisa elitshaye usana eHarare lwafa.
Umsekeli kamgcinisihlalo walelibandla uMnu Job Sikhala lentathelizindaba uHopewell Chin’ono labo babotshelwe icala linye.
UChin’ono uncitshwe imvumo yokukhululwa ngesibambiso sebail izolo.
Owayengumeya weHarare njalo engoweMDC Alliance uMnu Jacob Mafume, oselamaviki amabili evalelwe laye uzamiswa enkantolo namuhla.
UMafume wetheswa icala lokuzama ukuvimba ingalo yomthetho phezu kolunye njalo udaba abhekane lelo olwenkohlakalo.