Umahluli wenkantolo yezemisebenzi eyeLabor Court uthi akukho emthethweni okwenziwa ngodokotela abalamalanga angamatshumi amabili lantathu bekhalale umsebenzi.
UMahluli Betty Chidziva, owethule isinqumo lesi ngoMgqibelo ntambama, uthe kumele odokotela babuyele emsebenzini ngesiphangiphangi ngoba abavunyelwa ukukhalala umsebenzi.
Uthe inhlanganiso eqhatsha odokotela eyeHealth Service Board (HSB) ilelungelo lokuthi ingabhadali iholo labodokotela njalo lokujezisa bonke abakhalala umsebenzi.
Igqwetha elimele odokotela laba enkantolo le, uMnu. Munyaradzi Gwisai, ubefuna ukuthi udaba lolu luphanyekwe emthethwandaba weConstitutional Court kodwa uMahluli Chidziva wathi lokhu kungeke kwenzakale ngoba odokotela basebenza umsebenzi oqakathekileyo.
Kodwa-ke uDokotela Mthabisi Bhebhe, unobhala jikelele wenhlanganiso yabodokotela eyeZimbabwe Hospital Doctors’ Association(ZHDA), ulobele odokotela abakhalale umsebenzi esithi bengethuswa yisinqumo lesi esikubeke sobala njalo ukuthi iHSB ilelungulo njalo lokungabhadali iholo lalabo abakhalale umsebenzi.
“Manene lamanenekazi sesifika kuzinga eliphezulu lokutshengisela kwethu. Asikafiki emaphethelweni. Nxa singabuyelanga emsebanzini silakho ukuxotshwa umsebenzi njengalokho okumunyethwe ngumthetho weHealth Service Act okwakumele usetshenziswe ukusixotsha umsebenzi kungakanjwanga enkantolo. Kusobala ukuthi umqatshi usethwele nzima. Asibuyeli emuva. Kumele kulungiswe konke okusihluphayo singakabuyeli emsebenzini. Sizabuyela sokulamadola eMelika. Asibatshengiseni ukuthi kayizosigqili …”
Odokotela bafuna ukuthi babhadalwe iholo ngamadola eMelika, kuvuselelwe uhlelo lwabo lwezimota, banikwe okokusebenzisa ezibhedlela lokunye okufanayo. Uhulumende uthi kasoze abaholise ngamadola eMelika ngenxa yokusilela kwemali eZimbabwe.
Kasenelisanga ukukhuluma ngodaba lolu loDokotela Obadiah Moyo, umphathintambo kahulumende obona ngezempilakahle.