Ibandla leMDC-T ngoLwesihlanu lixotshe ozithi nguye umkhokheli walelibandla uNkosazana Thokozani Khupe, umqoqi wenhlelo zalo uMnu Abednico Bhebhe lobeyisikhulumeli salo uMnu Obert Gutu.
Abathathu laba baxotshwe lidale leMDC-T National Council ngemva kokuvumelana phakathi kwamalunga alo emhlanganweni eliwenzele eHarare.
Betheswa umlandu wokungcolisa igama lebandla ngokwala ukulandela izinqumo zalo kanye lokuqhuba imihlangano lenhlelo zabo bengakhulumisananga labanye abakhokheli bebandla.
Ibandla leli lithi uMaKhupe loBhebhe sebemisiwe njalo ukuba ngamalunga edale lephalamende.
Liphinde lafisela obengumgcinisihlalo walo uMnu Lovemore Moyo inhlanhla ngemva kokulibhalela incwadi elazisa ukuthi usephumile kulo.
UMaKhupe yena wazise ngeviki edlule ukuthi icele alikhokhelayo seliphumile kucele elisekela uMnu Chamisa.
UChamisa loMaKhupe babanga ubukhokheli beMDC-T obutshiywe ngumuyi uMnu Morgan Tsvangirai.