amalinks wokungena

Breaking News

Umanyano weSadc Usuthumele Iqula Lesibili Ukuyabhula Umlilo eEswatini


eSwatini protest

Umanyano weSadc ngoLwesithathu uthumele iqula lesibili kweleEswatini ukuyakhulumisana lenhlangothi ezitshiyeneyo ezigoqela abenhlanganiso ezizimeleyo, abamabandla aphikisayo kanye lalabo abatshengiselayo besola umbuso wenkosi uMswati III besithi ulochuku.

Amalunga equla logatsha lweSadc Troika leli agoqela iziphathamandla zeZimbabwe, ezaseBotswana lezakweleSouth Africa.

Iqula leli like lathunywa kulelolizwe kumaviki ambalwa edluleyo ukuyabhula umlilo kodwa lafika lazikhulumela leziphathamandla zikahulumende kuphela.

Lokhu kucunule kakhulu abatshengiselayo besola umbuso kaMswati, okwabangela ukuthi iSadc iphume lesinqumo sokuthumela leliqula okwesibili.

Uhambo lolu luza ngesikhathi ubudlwangudlwangu busiya phambili kweleEswatini njalo lamasotsha esetheswa umlandu wokuqhubeka ebulala abantu abatshengiselayo ezitaladeni.

UMongameli Mokgweetsi Masisi, ongumgcinisihlalo wogatsha lweSadc olubona ngezomvikela lokuthula, uthi iqula lanamuhla leli lizahlangana lenhlangothi zonke ukuze kutholakale isisombululo kudaba lweEswatini.

“Sengithumele iqula lesibili ukuthi liyenhlangana labo bonke abakuloludaba, ngemva kwalokhu babike kunhlanganiso yeziphathamandla zeSadc,” kutsho uMasisi.

Kodwa abomanyano osekela ukutshengisela kweleEswatini oweSwaziland Solidarity Network (SSN) bathi abazi lutho ngezethekeli zeSadc.

Isikhulumeli salumanyano uMnu Lucky Lukhele uthi uma iSadc izimisele ukuqeda udaba lolu, kumele ikhulumisane lenhlangothi zonke.

“Siyayizwa inkulumo kaMongameli Masisi njengomgcinisihlalo weOrgan on Politics, Defence and Security. Akulakuhlonipha kulokhu abakwenzayo ngoba akula onxusiweyo kuhlangothi lwalabo abakucele labatshengiselayo,” uMnu Lukhele utshele iStudio 7.

Uthi baqoqa okunye ukutshengisela ngoLwesihlanu emadolobheni atshiyeneyo afana leMbabane kanye leManzini.

UMswati laye ukhangelelwe ukukhulumisana lomphakathi ngoLwesihlanu ngesikhathi somkhosi obanjwa minyaka yonke oweSibaya.

ULukhele uthi kuqakathekile ukuthi iSadc ihloniphe abatshengiselayo ihlale phansi labo.

“KuMasisi, kuqakathekile ukuthi abize inhlanganiso ngokutshiyana kwazo, njalo abane ukuthi kuyahlanganwa lalabo abazithola bephakathi kwalolu dlakela, kanye lokubulawa kwabantu yingwenyama, uMswati weSithathu,” uqhubeke etsho uLukhele.

Inhlanganiso yeAmnesty International ithi sokufe abantu abangamatshumi amabili kweleEswatini bedutshulwa ngamasotsha lamapholisa ngesikhathi betshengisela.

Kodwa abamabandla aphikisayo, wona angavunyelwayo kulelolizwe, bathi bedlula amatshumi amane asebefile.

Udlakela lweEswatini luqale kumaviki ambalwa edluleyo lapho abatshengiselayo abangene khona ezitaladeni batshisa amanye amabhizimusi besithi bafuna umbuso kaMswati wobukhosi uguqulwe kube lombuso okhululekileyo elizweni labo.

please wait

No media source currently available

0:00 0:02:53 0:00

Facebook Forum

XS
SM
MD
LG