amalinks wokungena

Breaking News

UMaseko Ubukisa Imifanekiso Yokudweba eyeGukurahundi KweleSouth Africa


Umdwebi uOwen Maseko lemifanekiso yakhe yokudweba eyeGukurahundi eyaliswa eZimbabwe nguhulumende

UMaseko usungule umbukiso wemifanekiso lo,eJohannesburg kweleSouth Africa emahofisini enhlanganiso yeOpen Society Initiative for Southern Africa.

Owake wabotshelwa ukubukisa imfanekiso yokudweba esola udaba lweGukurahundi uMnu Owen Maseko uthi udaba lombuqazwe lo, luyisilonda esileme selatshwe ngoba uzulu weMatabeleland leMidlands lokhu ebuhlungu ngokubulawelwa izihlobo lokuhlukuluzwa libutho leFive Brigade.

UMnu Maseko ubotshwe ngo2010 ngemva kokubukisa imifanekiso ayidwebileyo eArt Gallery koBulawayo.

Kodwa okwamanje uMaseko usesungule umbukiso ofanayo njalo kweleSouth Africa emahofisini enhlanganiso yeOpen Society Initiative for Southern Africa edolobheni leJohannesburg.

Umbukiso lo uqale mhlaka 25 ngenyanga esanda kwedlula njalo uphela mhlaka 22 kulinyanga.

UMaseko uthi uyathokoza ngokuthola ithuba lokubukisa imfanekiso yakhe le eSouth Africa njalo uthi udaba lweGukurahundi kumele kukhulunywe ngalo ngoba belokhe bebuhlungu abantu abanengi.

Ibutho leFive Brigade labulala abantu abedlula inkulungwane ezingamatshumi amabili phakathi kuka1983 lo1987 eMidlands leMatabeleland njalo uMongameli Mugabe kakaze axolise ngalokhu.

Le yinto esolwa kakhulu nguMaseko labantu abanengi ezigabeni zombili.

XS
SM
MD
LG