Umphathintambo wezemfundo uMnu Cain Mathema uthi uhulumende uzakhweza iholo lababalisi ukuze benelise ukuziphilisa ngalesisikhathi eleZimbabwe libhekane lomkhuhlane weCovid-19.
UMathema wethule amazwi la emhlanganweni okhangelane lokuthuthukisa inhlelo zemfundo ongenwe ngamazwe omhlaba oweGlobal Education Summit, osungulwe izolo ntambama njalo ogqitshwa namuhla.
Umhlangano lo uqhutshwa yinhloko kahulumende weBhilithani uMnu Boris Johnson loMongameli Uhuru Kenyatta weleKenya.
Abaphatheka kulumhlangano bangena ngobulembu be-internet besebenzisa inhlelo zabomabonakude besemazweni abo.
UMongameli weleMalawi uMnu Lazarus Chakwera udale inkulumo ngokuya kweleBhilithane mathupha elanda lumhlangano ngoba esithi ubulembu be-internet abusebenzi kuhle elizweni lakhe.
UMathema uthe eleZimbabwe lizimisele ukukhuphula imali eyabelwa ugatsha lwezemfundo ifike kumatshumi amabili ekhulwini, 20, percent njengamanye amazwe omhlaba, ukwenzela ukuthuthukisa inhlelo zemfundo.
Kodwa ingcwethi kwezemfundo uMnu Thandeko Zinti Mnkandla utshele iStudio 7 ukuthi kaboni lokhu kusenzakala.
