Umbukiso wamabhizimusi amancane laphakathi laphakathi usungule ngoLwesithathu eHarare ungenwa ngabavela emazweni angezansi yeAfrica, etshengisa okutshiyeneyo akulungisayo, kulenkuthazo yokuba amabhizimusi anje azinikele ngokugcweleyo emisebenzini ayenzayo.
Lumbukiso uthathelwe phezulu ngabamabhizimusi amancane laphakathi laphakathi asemhlubulweni wange zansi ye Africa abeze phansi kwe nhlanganiso ye Small Enterprises Development Agency SEDA yase zansi ye Africa.
Unkosikazi June Mokoka wenkampani yeThe Reformists yakwele South Africa uthi yena unikeza amacebo kubantu kundaba zenthuthuko kumabhizimusi njalo uthi abatsha be Zimbabwe le Africa nje kabathatheli phezulu amathuba atholakalayo ukuba bathuthuke ngoba lo sizo lolwazi lukhona. Uthi izwekazi le Africa sokumele lithuthuke njalo lifuna abantu abazinikeleyo njalo belokukhalipha ukuba lithuthukiswe ngamathuba elilawo.
UMokoka ungumlobi wezingwalo njalo edinda ingwalo eGoli ethi kulokukhala ngokusilela kwemisebenzi abatsha sokumele besukume bezisungulele eyabo imisebenzi.
Kwele Zimbabwe abatsha babhekana lodubo lokusilela kwemisebenzi okukusimo esiphezulu kakhulu kodwa unkosikazi Pulane Mofokeng olungisa imphahla yabobaba, ama jean, ama tie, lezikwama zabomama uthi inkinga zivele ziyinxenye yempilo ngakhoke ukhuthaza ukuba okudingakalayo yikuma ngezimbili unqobe.
Umnumzana James Chokuda ulungisa amacici ese Wedza njalo uthi inkinga alayo yikusilela kosekelo lwemali lendawo loba umkhambo wokuthengisela akulungisayo ethi uzathatha lelithuba lalumbuthano ukudinga amathuba kwabanye bakhe abavela kwamanye amazwe ukuze athole abathengi.
UBongani Mdletshe ukhokhela ibhizimusi le TVT eliquba umsebenzi wokulungisa insimbi lokwakha ngazo. Uthi eZimbabwe ubona amathuba ekhona njalo ethi ezansi ye Africa bona njengamabhizimusi asakhulayo benelise ukusukuma ngoba belobudlelwano lamabhizimusi amakhulu:
Lumbukiso ungenwa langamabhizimusi akuleli ikakhulu abathunga izigcoko, aba ma insurance labalungisa imisebenzi ye welding njalo uzagoqela lomhlangano we Conference kusasa usiyaphela ngoMgqibelo.
