amalinks wokungena

Breaking News

Umbukiso Wezokuthengiselana oweZimbabwe lnternational Trade Fair Uqale NgoLwesibili


ZITF 2021

Umbukiso wezamabhizimusi oweZimbabwe lnternational Trade Fair uqale koBulawayo, Ngolwesibili, kulabamankampani labamabhizimusi amancane abalutshwana ababukisayo kodwa besithi balethemba lokuthi bazathola ibhizimusi.

I-ZITF, engenziwanga nyakenye ngenxa yokuqhamuka kobhubhane lweCovid 19, ize wenziwa ngemva kokudluliselwa phambili kabili lonyaka ngenxa yeziqondiso zikahulumende zokumelana legcikwane leli ezeLockdown.

Umqondisi wenkampani yeZITF umnumzana Nicholas Ndebele ulandisa ngombukiso walonyaka.

“Kuzinsuku ezintathu ngeziqondene labosomabhizimusi. Ngizwa ngilentokozo ukuba loba nje usuku lolu libuye ngemva kwesikhathi eside kodwa inani lakhona, sile 357 ababukisayo. Okunye okumqoka engithanda ukuvezela uzulu yikuthi kulamankampani avele emazweni asigombolozeleyo abaphathekayo kumbukiso lo. Lokhu kuveza ukuthi silobudlelwano obuhle labo.”

Umnumzana Khumbula Dube owekampani ye Mineeazy Solution uthi bazama ngendlela zonke ukuthi bafinyelele abomsebenzi wokwemba emigodini ehlukeneyo yelizwe.

"Sifuna ukuthi sifinyelele ama Miners ethu ukuze babe kwazi ukuthi sikhona lokuthi wonke lawa ama solutions abayabe bewafuna kuma problems abahlangana lawo eMine zabo silawo. Njalo futhi sifuna ukuhlangana lamanye ama suppliers labanye nje abakhona Ku-industry ukuze sisizane. Sibona ukuthi leyi kungaba yi opportunity yokuthi si-builder wonalawo ama strategic partnerships.”

Omunye obebukisa evela kwele Kenya umnunzana Lazarus Munganda umsekeli kaChief of Mission weKenya uthi amankampani amanengi awabuyanga ukuzobukisa ngenxa yiCovid 19.

"Amankampani awayehlulekanga ukuza ngoba kuyisikhathi somkhuhlane weCovid-19, kodwa sibuyile ukuzotshengisa impahla esilazo. Sifuna ukukhuphula ubudlelwano bamabhizimusi eKenya ndawonye laweZimbabwe lamanye onke angabe engazi ngesilakho. Esikukhangeleleyo yikuthi ubudlelwano bamabhizimusi buzathuthuka."

Umnunzana Mike Ndiweni umqondisi weBulawayo Vendors and Traders Association uthi inengi labazisebenzayo alenelisanga ukuzobukisa ngoba bebengasebenzi.

"Okwenzakalayo yikuthi amabhizimusi malutshwane ikakhulu abazisebenzayo balutshwane abenelisileyo ukuthi bayebukisa etrade fair kubangelwa yikuthi abantu abanengi bebengasebenzi lonyaka lanyakenye kubangelwa yikuthi iCovid ivalise amabhizimusi amanengi kakhulu.Ngokunjalo abantu abanengi abenelisanga ukuthi babhadale izimali babukise imisebenzi yabo kuzethekeli eziyabe zibuya zivela kwamanye amazwe lakhonapha elizweni.

Umbukiso weZITF uzaqhubeka okweviki yonke njalo Ngolwesithathu, umsekeli kamongameli welizwe umnumzana Constantino Chiwenga ukhangelelwe ukuba ngumhlonitshwa emhlanganweni wabosomabhizimusi oweInternational Business Conference. UMongameli Emmerson Mnangagwa yena ukhangelelwe ukuvula okusemthethweni lumbukiso Ngolwesine.

Lonyaka kulamazwe alitshumi lanye abikwa ethe azaphatheka embukisweni lo. Amazwe la ngagoqela eleBotswana, South Africa, DRC, Belarus, Malawi, Mauritius Namibia, Kenya, Indonesia, Nigeria lele Tanzania. Amakampani abukisayo aweZimbabwe wona aphose afike amakhulu amane (396).

Umbukiso walonyaka wenziwa phansi kwendikimba ethi “Showcasing the New Normal For Business and Industry: Realities and Opportunities”

Facebook Forum

XS
SM
MD
LG