UDzamara oyintathelizindaba njalo engumlweli wamalungelo oluntu ubikwa wathunjwa ngabomthetho abasebenza nsitha ngesikhathi sombuso ka Robert Mugabe eminyakeni emithathu edluleyo.
Lumkhosi wandulela ozokwenziwa mhla ka 9 Mbimbitho, okulusuku lapho u Itai athunjwa ngalo ngomnyaka ka2015, isimithathu iminyaka engaziwa ukuba usaphila na loba hatshi.
Abekade bekulombutho abedlula amakhulu amahlanu, bathi kabasafuni ukuzwa ukuba ukhona othunjwayo njalo besithi eZimbabwe, otholakala elomlandu wokwenza njalo makajeziswe kanzima njalo bahlawulwe abahlawulwayo.
Omunye wabasebenze lo Itai Dzamara, emkhankasweni owe Occupy Africa Unity Square, ngaleso sikhathi owawukhuthaza ukususwa kowayengumongameli Robert Mugabe esikhundleni, ebekwa umalandu wokuba esehluleka ukubusa njalo esekhulile, umnumzana Charles Nyoni ulandisa ngesiqokoqela somkhosi walamuhla oqoqwe ngokusebenzisana labenhlanganiso yakhe kanye labemhuli yako Itai ngaphansi kwe Itai Dzamara Trust.
U Nyoni uthi bafisa ukubonana lomongameli welizwe, ukubonisana laye phezu kwaloludaba lokunyamalala kuka Itai.
Isikhulumeli seqembu le Tajamuka/Sesijikile u Ostallos Siziba, uthi ukubone kufanele azemanyana labemhuli yako Itai labanye kulomkhosi ngoba ethi uyakuzwisisa ukuthunjwa ngoba laye wake wehlelwa yilolu hlupho.
Abakufisayo njengabasakhulayo u Siziba ethi yikubona imhuli yako Itai isisazi ukuba kuyini okwenzakala kusihlobo sabo.
Bebekhona abaze bemele izifundi kulomkhosi okubalisa umnumzana Ashley Pfunye, unobhala jikelele wenhlanganiso yezifundi zemakolitshini lema university eye Zimbabwe National Students Union.
UPfunye uthi ukuthunjwa kuka Itai bekuzwisisa njengezifundi njengoba abanye babo sebeke bahlangana lakho.
Umfowabo ka Itai, u Patson Dzamara utshele lumbuthano ukuba bafisa ngaye kuyafezeka ayekukhankasela okubalisa ukuqhutshwa kokhetho olwamukelwa ngumuntu wonke emhlabeni.
U Patson uthi lapho sekwazakele ukuba ukuphi u Itai, ephila loba sewabhubha, ufisa ukuba bahlawulwe njengemhuli kunhlungu abahlangana lazo iminyaka yonke le engazakali lapho akhona.
Wengeza ethi kabayi kuphumula bazoqhubeka beluphakamisa loludaba luka Itai njengalokho kade bevele bekwenza sonke lesi isikhathi.
Wenziwe ngokuthula lumkhosi kungekho kuhlukumezwa ngamapholisa njengalokho obekusenzakala ngesikhathi sombuso kaMugabe.
Ungenwe njalo ngabekade beze bemele abezombusazwe okubalisa umnumzana Jacob Ngarivhume owe Transform Zimbabwe kanye labafundisi ababalisa umfundisi Patrick Mugadza lo Evan Mawarire.