amalinks wokungena

Breaking News

Iqalisa NgoLwesine Imidlalo ye2018 World Cup


Umongameli wenhlanganiso yenguqu eyeFIFA ukhuluma ngesikhathi kukhethwa amazwe azaqoqa umncintiswano weWorld Cup ngomnyaka ka2026.

Abalandeli bomdlalo wenguqu bathi sekubaphuzele ukuqala kwemidlalo yezizwe zomhlaba yona ekhangelelwe ukusungulwa okusemthemthweni ngoLwesine elizweni lase Russia.

Umncintiswano lo uzafika emaphethelweni mhla zilitshumi lanhlanu kunyanga kaNtulikazi.

UNkosazana Kathrine Siziba uthi ukuba khona kwalimidlalo yezizwe zomhlaba kutsho ukuba sekuzavuka impi kubangwa ukuba kubukelweni ezindlini phakathi kwabesilisa labesifazane.

“Sesiyathwala nzima ke lapha ezindlini ngokuqala kwemidlalo yezizwe zomhlaba njengoba sesizabe sesibanjwa ngamandla ukuba sibukele umdlalo wenguqu kulokuthi sibone ezethu inhlelo esizithandayo.”

Amaqembu amela amazwe angamatshumi amathathu lambili yiwo azaphatheka kulimidlalo njalo lawa ngagoqela angamatshumi amathathu lanye wona athole ilungelo lokuyadlala kwele Russia ngemva kokunqoba kumncintiswano eqhutshelwe kumazwekazi atshiyeneyo kanye lalo ilizwe eliqoqe limidlalo ele Russia.

Intathelizindaba yezemidlalo uNash Mkokwayarira uthi abalandeli bomdlalo wenguqu sebehle balungiselela ukubona limidlalo ngokubhadala inhlawulo zikamabonakude ngoba bengafuni ukukhutheka.

“Abanengi bakhangelele amaqembu abalisa ele Brazil, ele Argentina, ele Spain kanye lele England ukuba yiwo angaphakamisa isicoco lonyaka kodwa njengabantu base Africa bakhangelele njalo umdlali welizwe lase Egypt uMo Salah ukuba engenza izimanga.”

Amazwe amele izwekazi lase Africa kumidlalo yalonyaka eyezizwe zomhlaba ngagoqela ele Egypt, ele Nigeria, ele Morocco, eleTunisia kanye lele Senegal.

Loba kulamazwe amahlanu amele izwekazi lase Africa uFaith Ndlovu uthi yena uyabe esekela iqembu le Spain.

“Thina sesiyimelele imidlalo yezizwe zomhlaba njalo elami iqembu engilisekelayo ngele Spain okungidanisayo nje yikuba iqembu le Italy alikho kumidlalo yalonyaka.”

Iqembu elimela ilizwe lase Germany yilo eliphethe isicoco ngemva kokunqoba kumidlalo eqhutshelwe elizweni lase Brazil ngomnyaka ka 2014.

Iqembu elimela ilizwe le Zimbabwe kalizange liphatheke kumidlalo eyokudinga amazwe azaphatheka kulumncintiswano njengoba lamiswa yinhlanganiso yeFIFA ngoba lingakhokhelanga umqeqetshi oyisizalwane selizwe le Brazil uValinhos.

Iqembu elimela ilizwe le Russia lizadibana leqembu elimela ilizwe lase Saudi Arabia emdlalweni wakuqala walumncintiswano ngoLwesine.

Facebook Forum

XS
SM
MD
LG