amalinks wokungena

Breaking News

Sebedlela Evalweni Abantu koBulawayo Ngokumemetheka Ngamandla Komkhuhlane weCOVID-19


Abantu abanengi koBulawayo bathi bethuswa yikukhuphuka kwenani lababulawa ngumkhuhlane weCOVID-19 labawuthapha emphakathini.

Lokhu kwenzakala ngesikhathi uhlangothi lwezempilakahle lubika ukuthi kulabantu abafika phose amatshumi ayisithupha – 58 ababulewe ngumkhuhlane weCOVID-19 eZimbabwe izolo kwathi abedlula inkulungwane ezintathu – 3,110 bahlolwe batholakala bele coronavirus.

Uhlangothi lolu luthi kusiyaphela usuku lwayizolo isabelo sakoBulawayo sibe labantu abangaphezu kwamakhulu amathathu – 358 abatholakale belegcikwane leCOVID-19. Sokulabantu abanengi abafisa ukuhlatshwa ijekiseni yokuzivikela kumkhuhlane lo koBulawayo lakwezinye indawo eZimbabwe.

UMongameli Emmerson Mnangagwa uthi kulez’insuku kuhlatshwa abantu abafika inkulungwane ezingamatshumi amane – 40,000 ngelanga. Kodwa abezempilakahle abazimeleyo bathi ngamanga aluhlaza tshoko la ngoba banengi abangatholi amajekiseni okuzivikela kumkhulane weCOVID-19.

UNkosikazi Shelly Nyoni, ohlala eNkulumane koBulawayo, uthi kuyethusa okwenzekala elizweni.

“Lo umkhuhlane weCovid 19 Langendlela abantu asebephela ngakhona angazi kumbe kungabe kudalwa kakhulu ngumqando but ngendlela engibona abantu sigcwele ngayo eclinic sisiya vaccinator kuyahlukumeza kakhulu ukuthi kwenzakalani abantu saphela ngesikhatshana.”

UNkosikazi Sizalobuhle Nhliziyo, obekudwendwe lokuhlaba ijekiseni eNkulumane Clinic, uthi abantu lokhe bebuthana nxa besenza okutshiyeneyo.

“Ukukhwela kwamacases eCovid silikhangele kodwa silokudana kakhulu ngokuthi besilokhe sitshelwa ukuthi indawo sezizinengi lapho okuvaccinator khona abantu kodwa sikhanya sibanengi sibuthene okokuthi ngabe ikhona eminye imizamo abayizamayo ukuthi ngelanga bathathe kumbe abantu abayi 50 abazakwanisa ukuthi babamonitor for isocial distance kungabi lokumemetheka kimkhuhlane.Lokhu kukhwela kwama cases yinto ephilayo lathi sikukhangele okukuthi a esibhedlela baba active ukwenzela ukuthi kungabi lokumemetheka kwemikhuhlane kusiya phambili.”

Esinye isakhamuzi sakoBulawayo, uMnu. Mkhokheli Ndlovu, uthi ukukhuphuka kwenani labalomkhuhlane weCOVID-19 kudalwa yikuthi abantu abalandeli iziqondiso ezifakwe nguhulumende.

“Ngicabanga ukuthi abantu abalandeli iziqondiso zeCovid yikho ilokhe ikhwela kangaka. Ngabe abantu bayalandela ngabe amacases ayehla, kumele bezame ukuthi belandele ukwenzela ukuthi silwisane lomkhuhlane.”

Umsekeli kaMeya wakoBulawayo, ukhansila Mlandu Ncube, uthi kumele abantu bahlatshwe ijekiseni yokuzivikela kumkhuhlane weCOVID-19.

“Sizwile imibiko ukuthi kulamanye ama clinic aphele ama Vaccine masinyane, lokhu kuvela kuzakhamuzi laloba singatholanga I-official communication kulabo abakhangele ama clinics. Lokhu kungabangelwa yikuthi mhlawumbe inani esilikhangeleleyo kuclinic lisuke laba linengi,asephela ama Vaccines okwalolo suku. Kodwa lokhu akutsho ukuthi ama Vaccines sephelile, engingakutsho yikuthi ama Vaccines asekhona asihambeni siyehlaba. Njalo uhlupho olukhona abantu bayathanda ukukhetha ama clinic kukanti zonke indawo zilawo ama Vaccines.”

USikhwicamfundo Solwayo Ngwenya, umqondisi wenhlelo zeMpilo Hospital, ukhuthaza uzulu ukuba alandele izixwayiso ezethulwa ngabezempilakahle.

“Ukubhubha kwabantu ngenani eliqansayo lapha koBulawayo lelizweni akumangalisi ngoba besikhuluma kakhulu sixwayisa abantu ngendaba yobhubhane lolu lwe corona virus, khathesi nje soluqalile ukubulala abantu ubhubhane lolu njalo alubuyeli emuva lungabulalanga abantu abanengi, yikho siyaxwayisa ukuthi abantu kumele balandele lokhu esakukhulumayo ukugqoka ama face masks bevale amakhala njalo bengenzi isiminyeminye, iziminyeminye lokhe zisenzakala abantu nxasikhangele, abantu kabananzelele ngoba sesisengozini kakhulu ebezama ukuthi siyivikele kodwa sesingani siyehluleka ngokuthi pho bakithi abantu sebebhubha ngenani eliphezulu.”

Abantu bathi kumele uhulumende ethulele uzulu imibiko ejulileyo ngokuvimba ukumemetheka komkhuhlane weCOVID-19 omemetheka ngamandla eZimbabwe. Emhlabeni wonke jikelele, isibhedlela seJohns Hopkins University sithi umkhuhlane lo usubulele abedlula izigidi ezine. Sithi kulabantu abedlula amabhiliyoni amane lengxenye – 3,5 billion asebehlatshwe ijekiseni yokuzivikela kumkhuhlane weCoronavirus.

Facebook Forum

XS
SM
MD
LG