Abahlohlele iZimbabwe Warriors ngukaputeni weqembu uKnowledge Musona kanye lo Prince Dube.
Iqembu le Algeria yilo ebeliqale ukuhlohla lalitshayela emambuleni kabili kwathi uMusona wahlohla elakuqala igoli le Zimbabwe kwasekusithi uDube wasehlohla elokulinganisa umdlalo ususiya fika komlindi uyacina.
Intathelizindaba yezemidlalo uNash Mkokwayarira uthi uDube utshengise ukuba kumele adlale kuqembu lama Warriors hatshi ukuhlaliswa phandle.
“Ukuhlohla kuka Prince Dube kumdlalo we Zimbabwe le Algeria kube yinto enhle njalo kutshengisa ukuba ngumfana ovutha amalangabi kulezinsuku.
Ukuhlohla kwakhe lokhu kutshengisa ukuba lokhu obekutshiwo ngumqeqetshi ukuba udlala kuligi ephansi akusebenzi ngoba nanko phela bakhona abadlala kwele Bhilithani abakade beliqalisile kodwa akula abakwenzileyo.
Lokhu kutshengisa ukuba ibhola alilakuthi udlala ngaphi kodwa kuya liya ngokuthi udlala njani,” kutsho uMkokwayarira.
Impumela yomdlalo wangoMvulo itsho ukuba iqembu le Algeria selilemiklomelo elitshumi phezu kwengalane yemiklomelo ngemva kwemidlalo emine kusithi ele Zimbabwe lilemiklomelo emihlanu njalo lizakuba kwazi ukuba lizaqhubeka lilokhu lisendaweni yesibili loba hatshi ekupheleni komdlalo weqembu le Botswana lele Zambia odlalwa ntambama.
Iqembu le Zambia lizangena kulumdlalo lihlezi endaweni yesithathu lilemiklomelo emithathu kusithi ele Botswana lisendaweni yesine lilomklomelo owodwa.
Emdlalweni walo olandelayo kumkhankaso wokudinga amaqembu azakuyadlala kumncintiswano we Africa Cup of Nations ozaqhutshelwa kwele Cameroon ngomnyaka ka 2022 iqembu le Zimbabwe lizadlala lele Botswana khonale kwele Botswana kuthi emdlalweni walo owokucina owesibaya sika Group H lizadibana lele Zambia emdlalweni ozaqhutshelwa kwele Zimbabwe.
