Abadala bathi isigogo sigoqwa sisemanzi, babuye njalo bathi umthwentwe uhlaba usamila.
Lokhu yikho kanye okwenziwa ngumlingisi weZimbabwe ongumhlabeleli njalo wezokholo uMnu Sibanjana Junior ngemithwentwe engabantwana bakoMbimba, ePlumtree.
USibanjana, yena oseke walingisa kumafilimu akweleSouth Africa afana leGenerations, usesungule isikolo esibizwa ngokuthi 'Zamimpilo Recreation Centre' lapho afundisa khona abantwana besigaba sakhe izifundo zezandla ezifana lokubumba izithombe ngomdaka, ukuhlabela, ukuloba inkondlo, ukudweba lokulingisa.
Uthe ngokuvalelwa yiCovid-19 ekhaya wakubona kufanele ukuthi asungule isikolo sokuhlomisa abantwana nanku besebetshona bezulazula nje ngoba izikolo zivaliwe.
USibanjana uthi ulabantwana abedlula amatshumi amabili abafundisayo, bona athi baleziphiwo ezimangalisayo.
Uthi iphupho lakhe ngelokuthi athole usekelo lokukhulisa izikolo sakhe lokwakha izindlu zokufundela kumbe uhulumende akhe isikolo esikhulu esifundisa imisebenzi yezandla eBulilima West.
