Abasakhulayo laba bathi njalo badaniswa yizenzo zamadodana kamongameli Robert Mugabe, uChatunga lo Robert Junior, abathi batshaphaza imali yelizwe, bezikholisela eGoli lapho bahlezi khona, uzulu esidla imbuya ngoluthi.
Ontanga laba bebekhulumisana lentathelizindaba ngemva komhlangano wenkokheli yaloluhlangothi lwebandla le MDC-T, owe Youth Assembly National Council, owenzelwe esigodlweni se Harvest House.
Ontanga laba bathi bayayisekela yonke imizamo yomkhokheli wabo, uMnu. Morgan Tsvangirayi, leyamabandla aphikisayo, eyokubumba umanyano we coalition phansi kwegama elithi MDC Alliance ngoba le kuyiyona ndlela kuphela engasusa umbuso kamongameli Robert Mugabe lenkokheli yakhe ye Zanu PF.
Umsekeli kasomlomo kuloluhlangothi, umnumzana Vusumuzi Moyo, ulandisa ngokufiswa ngabasakhulayo.
Abasakhulayo laba bathi bangalokothi abe Zanu PF, ukuqala udlakela ngoba bazokwenza konke okusemandleni abo ukulondoloza uzulu kakhulukazi owasemaphandleni.
Kungakho u Moyo ethi sebeqalile ukuqhuba imisebenzi yokwenqabela ukuqhamuka kodlakela ngabebandla le Zanu Pf, abathi lwande ukuqhamuka sikhathi sonke kulungiselelwa ukhetho lalapho selwedlule.
Ophethe uhlangothi lokulinganiswa kwamathuba phakathi kwabesilisa labesifazane kuhlangothi lwabasakhulayo laba, unkosazana Sithabile Mlilo, uthi bazilungiselele ukulwenqabela lolodlakela nxa luthe lwaqhamuka.
U MaMlilo uthi kunje baphakathi kokufundisa uzulu wemaphandleni, kakhulukazi abasakhulayo, ukuba bangaze bavuma ukwethuselwa ngabebandla le Zanu PF.
Abasakhulayo laba bathi bajatshuliswa yisinqumo esithethwe yinkokheli yabo ebeke eceleni isilinganiso sokungamatshumi amabili ( 20% ) sezikhundla ezizoncintiswa kube ngezabasakhulayo kukhetho luka 2018.
Bathethe lelithuba ukuncoma indlela amapholisa akoBulawayo kanye leziphathamandla zenhlanganiso ye Zimbabwe Electoral Commission – ZEC abaziphathe ngayo ngokungabahlukumezi lapho betshengisela ukukhonona kwabo kudaba lokulethwa kwenguquko kumithetho elawula ngokhetho elizweni.
Kuthi,udlakela olutshengiswe ngunkosikazi Grace Mugabe, kuntombazana, yakwele South Africa, uGabriella Angels, kulihlazo.
Bathi balethemba lokuba uzulu we South Africa usekuzwisisa lokho abahlezi bekhala ngakho e Zimbabwe bona omakhelwane bekutshaya indiva nje, ukuba umndeni wakoMugabe, ungobusa lokuphila ngodlame.