amalinks wokungena

Breaking News

Kwenziwa Umhlangano Wabazisebenzayo Ngabesigodlo Sommeli weNetherlands


Kwekwe Vendors

Abesigodlo sommeli we Netherlands eZimbabwe babambe umhlangano omkhulu ngoLwesibili wokufundisana labazisebenzayo ngenhloso yokubafundisa indlela ezingabaphathisa ukuthuthukisa imisebenzi yabo bephumelela.

Lumhlangano ocine usandelwa ngabantu ukhokhelwe ngusomabhizimusi wakwele Ghana umnumzana Tonyi Seneyah olungisa izicathulo ezimele. USeneyah ucasise ukuba abantu kumele basebenzise indlela ezingaduliyo zokwazisa ngezinto abazithengisayo, ezifana lenkundla zebulenjini o-facebook, instagram le twitter kunye lokusebenzisa indlela yokwazisana ngomlomo ukuba abakuthengisayo kuthole abangakuthenga njengalokho akwenzayo yena ephumelela.

Umqondisi wenhlanganiso ye Zimbabwe Informal Sector Organization umnumzana Promise Mkhwananzi uthi abantu be Zimbabwe balesifiso esikhulu sokusebenza kanzima noma belenkinga:

Abanengi bakhala ngokusilela kwemali kunye lezikwelede zokuba bethuthuke kodwa u Seneyah uthi kulapho abanengi abalahleka khona ngoba besungula kucele elingayisilo okuyinto egcizelelwa ngunkosikazi Thandiwe Mlobane oyingcwethi kwezokucebisana ofundisa omama ngendlela abangazithuthukisa ngazo empilweni:

Uthi okudingakalayo yikulungisisa into ezwayo kunye lokukhetha into efunakalayo njalo uyithengise ikusimo esijabulisayo usiba lobudlelwano obuhle labantu othengiselana labo okungakwenza ukuba lawe uthuthuke:

Umsekeli wommeli we Netherlands eZimbabwe umnumzana Maarten Rusch uthi njengezigodlo zabammeli bamanye amazwe elizweni bavame ukuphatheka kwezombusazwe ethi babone kufanele ukuba baqhelise imisebenzi yokubambisana lokuphana amacebo kwezomnotho ukuze uzulu athuthuke lelizwe liphumelela. Ethi noma ilizwe lakhe lifisa ukuvula amabhizimusi kuleli babona umumo wezinto ungakalungi ukuba lokhu kwenzakale ngakho lokhe bekhulumisana lohulumende ngaloludaba asebekuqale ngokuhlangana lomphathintambo wezamabhizimusi amancane laphakathi laphakathi njalo kuyinto abazaqubekela phambili beyenza lohulumende.

XS
SM
MD
LG