amalinks wokungena

Breaking News

Kwenziwa Umhlangano Wamabandla Aphikisayo koBulawayo Ngezokhetho


ZESN
ZESN

Amabandla ezombusazwe aphikisayo athi akathokozi ngenguquko ekhona emthethweni wokuqhuba ukhetho elizweni ngoba zinengi izikhalazo zikazulu ezitshiywe phandle ikakhulu ukuvunyelwa kwezizalwane eziphandle kwelizwe ukuthi zivote kanye lokuvumela inhlanganiso ezizimele zodwa ukufundisa abantu ngokhetho zingadinganga imvumo kukhomishini ephatha lumsebenzi.

Lokhu kuphume emhlanganweni kazulu ophathwe ngoLwesithathu emzini weLuveve koBulawayo obizwe yinhlanganiso ebona ngezokhetho eyeZimbabwe Electoral Support Network.

Umhlangano lo ubujonge ukuthi abezombusazwe bakhulumisane lezakhamizi behluza umthetho omutsha wokuphatha ukhetho iElectoral Amendment Act, oqale ukusebenza ngoMbimbitho lonyaka.

Umthetho lo uze kulandela ukuxoxisana ngenguquko uzulu azifunayo kanye lokuqakatheka kokuthi imithetho yelizwe ihambelane lesisekelo sombuso esitsha.

Umnumzana Kucaca Phulu, obemele ibandla leMDC Renewal Team, uthi bayemukela izimiso zesisekelo sombuso esitsha kodwa badaniswa yikuthi kulokuthile okungalandelwanga sokubekwa umthetho lo. Uthi kulilungelo lezizalwane zonke ukukhetha abammeli kodwa lumthetho awuphi izizalwane ezingaphandle kwelizwe lelilungelo.

Lumthetho uthi abalelungelo lokuvota bengaphandle kwelizwe ngabahanjiswe nguhulumende kuphela hatshi abazihambeleyo nje.

UMnumzana Phulu uqhubeke esithi bayakhathazeka njalo ngokuqhubeka kuka Registrar General ephatheka kwezokhetho ngaphansi kwalumthetho sona isisekelo sombuso sisithi kasuswe amandla onke anikwe iZimbabwe Electoral Commission.

Umnumzana Edward Nare owebandla le ZAPU, uthi bananzelele kukhetho oludluleyo ukuthi amaphephandaba kahulumende ebelenkethabetshabi ikakhulu umsakazo welizwe iZimbabwe Broadcasting Coorporation kodwa lokhu akukaguquki. Uthi kodwa bayajabula ukuthi abazakhangela ukhetho ama observers asenikwe amandla angezelelweyo ngoba yibo abalakho ukukhuluma iqiniso ngokuqhutshwa kokhetho.

UmnumzanaAbednico Moyo ukhangela ukuqhutswa kokhetho kubandla le Movement for Democratic Change elikhokhelwa nguMnumzana Welshman Ncube. Uthi bebekhangelele ukuthi inhlanganiso ezizimele zodwa zinikwe amandla okufundisa uzulu ngokhetho ngoba ulwazi luyasilela kuzulu kodwa lokhu akwenziwanga kulumthetho. Uthi lo ulokhu ungumsebenzi we ZEC, engelamali eneleyo ukuqhuba lumsebenzi ngendlela kuthi ezinye inhlanganiso kazingeke zawenza lumsebenzi zingadinganga imvumo ku khomishini le.

Abe ZESN bathi bebenxuse abameli bamabandla e ZANU PF kanye le MDC ekhokhelwa nguMnumzana Morgan Tsvangirai kodwa abenelisanga ukuzangenalumhlangano.

XS
SM
MD
LG