amalinks wokungena

Breaking News

Kwenziwa Umhlangano eMelika Ohlolisisa Okwenzakala eZimbabwe


Abanye abake bengena umhlangano ohlolisisa okwenzakala eZimbabwe.

Ikhomithi yedale leSenate eMelika eyeUnited States Senate Committee on Foreign Relations ikhangelelwe lamuhla ukuthi izahlolisisa okwenzakala eZimbabwe lapho okusanda kususwa uMongameli Robert Mugabe esikhundleni kwangena uMongameli Emmerson Mnangagwa.

Izizalwane zeZimbabwe ezikhangelelwe ukuthi zizakhuluma emhlanganweni lo zigoqela uMnu. Dewa Mavhinga olwela ilungelo likazulu, uMnu. Tendai Biti owayengumgcinincebo welizwe leZimbabwe kuhulumende womanyano kanye loMnu. Peter Godwin intathelizindaba ehlala eNew York.

Abanye abazabe besemhlanganweni lo nguMnu. Nelson Chamisa, umsekeli kamongameli webandla leMDC-T loMnu. Jacob Ngarivhume webandla leTransform Zimbabwe.

UStephanie Sullivan, omunye wabasekeli bakanobhala weBureau of African Affairs kuhlangothi lukahulumende olubona ngokudlelana lamanye amazwe olwe United States Department of State, ukhangelelwe ukuthi uzakhuluma ngokwenzakala eZimbabwe.

Umhlangano lo uzabe uqhutshwa ngaphansi kwe Subcommittee on Africa and Global Health Policy edlelana leSenate Committee on Foreign Relations.

UNgarivhume uthe bazabikela ilizwe leMelika ngokwenzakala eZimbabwe kulandela ukususwa kukaMugabe esihlalweni sikamongameli njalo langokhetho oluzayo.

Uthe kuqakathekile ukuthi amabandla aphikisayo avezele ilizwe leMelika ngokuthi kwenzakalani eZimbabwe.

UNgarivhume uphinde wathi bazakwenza imihlangano lenhlanganiso ezitshiyeneyo ezigoqela ezibona ngelungelo likazulu lokuqhutshwa kokhetho kanye leziphathamandla zikahulumende kaMongameli Donald Trump.

Umngcinisihlalo webandla leMDC-T eMelika, uMnu. Den Moyo, uthe kumele abazakhuluma emhlanganweni lo bakubeke sobala ukuthi kufunakala ukhetho olubalulekileyo eZimbabwe.

UMoyo uthe kumele bakhulume langebutho leZimbabwe elilokhe lisemigwaqweni lobanje owayengumongameli, uMnu. Robert Mugabe, sowaphuma esikhundleni.

Kodwa-ke abalandeli bebandla leZanu PF, uMnu. Frenk Guni loMnu. David Ndlovu, bathe akulunganga ukuthi abantu abakumanyano weMDC Alliance basabalale umhlaba wonke jikelele bekhuluma okubi ngelizwe leZimbabwe.

UNdlovu uthe kusobala ukuthi bazakhuluma ngokuqiniswa kwezijeziso zenotho ezafakelwa uMugabe labanye bakhe ngamazwe entshonalanga ekhonona ngokungaqhutshwa kahle kokhetho lokukhahlameza uzulu.

Uphinde wathi okumangalisayo yikuthi abantu laba sebegijimela eMelika uMongameli Mnangagwa engakenzi lutho eZimbabwe.

Kulomthetho welizwe leMelika obizwa ngokuthi yi Zimbabwe Democracy and Economic Recovery Act of 2001 ovimba ukuthi amankampani eMelika angadlelani lalabo abafakelwe izijeziso zenotho.

Kwenziwa Umhlangano Ocubungula Okwenzakala eZimbabwe
please wait

No media source currently available

0:00 0:03:29 0:00

Facebook Forum

XS
SM
MD
LG