Ibandla leMthwakazi Republic Party (MRP) limisane lexuku lamapholisa labacuphi bakahulumende eRichmond koBulawayo izolo ngemva kokuthola umbiko othi omunye owalwa impi yenkululeko owakhubazekayo ngesikhathi seGukurahundi uhlukuluzwa ngamapholisa labasekeli beZanu PF.
Ku-video esezandleni zalumsakazo umkhokheli walelibandla uMnu Mqondisi Moyo ubonakala ekhuza amapholisa esithi engalokothi ahlukuleze uMnu Better Tshuma.
UTshuma waphiwa inqola yokuhambisa, i-wheelchair, libandla leMRP ngoba wakhubazeka inyawo.
Abasekeli beZanu PF lamapholisa babikwa bengakujabulelanga lokhu baqala ukumhlukuluza bembuza imibuzo engapheliyo.
UMoyo utshele iStudio 7 ukuthi ukuhlukuluzwa okunje kuvamile kodwa abantu besaba ukuza phambili bekhulumisane lebandla lakhe.