Ugatsha lwezempilakahle luthi kubhubhe oyedwa ngeCovid-19 eZimbabwe ngoLwesibili. Kutholakale njalo abangamatshumi phose amane, 37, belomkhuhlane lo.
Abahlatshwe ijekiseni yakuqala yokuvikela lumkhuhlane bedlula inkulungwane ezilitshumi lane, 14,581 kuthi abahlatshwe eyesibili bazinkulungwane phose eziyisitshiyangalombili, 7,808.
Asebebhubhile bonke sebefike ku4,691. Phakathi kwababanjwe lumkhuhlane izolo, oyedwa ngowesinye isikolo koBulawayo kuthi omunye ngowesikolo seManicaland.
Umqondisi wenhlanganiso ephatheke kunhlelo zokwenqabela ukumemetheka kweCovid-19, iZimbabwe Christian Alliance, uMnu Useni Sibanda, uthi okunye okungaba kubangela ukuqansa kwenani labantwana besikolo ababanjwa lumkhuhlane yikuthi basuke balibale ukulandela iziqondiso ezihlelwe ngabezempilakahle ezifana lokugqoka ama-mask, ukuqhelelana lokuhlala begeza izandla ngesepa.
Ngesonto kulabantu abedlula itshumi, 12, ababanjwe lumkhuhlane ezikolo zakoBulawayo.
Kuthange ugatsha lwezempilakahle lubike ukuba kulabafundi ababili njalo ababanjwe lumkhuhlane ezikolo zeMashonaland West.