Ummeli weMelika eZimbabwe, umnumzana Harry Thomas Junior, uthi akaboni kusiba lenguquko kundlela uhulumende wakhe azosebenzelana ngayo lele Zimbabwe, kungakhathalakile impumela yokhetho lokudinga umongameli elizweni lakhe.
Utsho lamazwi uAmbassador Thomas, emkhosini obusemahofisini ohlangothi olubona ngezokukhulumisana lozulu olwe Public Affairs Section, lamuhla ekuseni, wokulindela impumela yokhetho lwelizwe lakhe.
Ethi aleqiniso lakho yikuba uhulumende weMelika, uzoqhubeka eqinisa imikhankaso yakhe yokulondolozwa kwelungelo loluntu lokuqhutshwa kokhetho oluzayo ngendlela esuthisa uzulu weZimbabwe.
Wathi uleqiniso lokuba ezoqhubeka ngenhlelo abekade ezisekela elizweni uhulumende wakhe okubalisa ukutholisa usizo kwezempilakahle, ukudla ngalesi sikhathi sendlala, uhlelo lokuthuthukisa inkokheli yabasakhulayo olwe Young African Leaders Initiative – YALI lezinye ezinengi.
Abaze emkhosini wokudla kwekuseni owe U.S. Presidential Election Breakfast, banikeze imibono ehlukeneyo phezu kwempumela yokhetho lweMelika, lapho umnumzana Donald Trump, webandla lama Republican enqobe uNkosikazi Hillary Clinton wamaDemocrats.
Umqondisi wenhlanganiso ye Zimbabwe Peace Centre, umnumzana Trust Mamombe, uthi limpumela itshengisa ukuba izizalwane zeMelika, zizwisise obekutshiwo ngu Trump, okungazwisiswangwa ngabantu umhlaba wonke jikelele. Ethi kunengi okungafundwa nguhulumende weZanu PF eZimbabwe, ukuba ukhetho luqhutshwa njani kungela dlakela.
Banengi abekade bekhangelele ukunqoba kukankosikazi Hillary Clinton, okubalisa umnumzana Nqaba Matshazi, ongumhleli kwelinye lamaphephandaba elizweni, obelesifiso sokuba ngabe kungene owesifazane kulesi sikhundla.
Unkosazana Faith Ndlovu, ngomunye wabaphatheka kuhlelo lokuthuthukiswa kwabasakhulayo, olwe Young African Leaders Initiative – YALI, laye uthi ubekhangelele ukuba uNkosikazi Clinton nguye ozonqoba kulolukhetho. Zinengi izifundo, uMaNdlovu athi inkokheli kuleli, engafunda kizo ekuthini luqhutshwa njani ukhetho kungekho kuhlukumezana.
Kwasekelwa ngumgcinisihlalo wesigaba seHarare ebandleni le MDC elikhokhelwa ngu Proffessor Welshman Ncube, umnumzana Thomas Mgutshini.
Inkokheli ingazinikela, uMgutshini uthi lele Zimbabwe lingafika kuleso sibanga lapho umuntu ukhetha amathandayo kungekho kwesaba. Etsho ukuba kungani befisa ngabe kube nguNkosikazi Clinton othethe lesi sikhundla.
Umangalise abanengi umnumzana Donald John Trump ngokunqoba kulolukhetho, esiba ngumongameli wesimatshumi mane lanhlanu weleMelika, lanxa inengi labantu belikhangelele ukuba kuzokuba ngunkosikazi Hillary Clinton, webandla lamaDemocrates ozonqoba.
