Ibandla leMDC-T libikwa liphakathi kokukhulumisana leleZanu PF kunkulumo ezilakho ukwenza ukuthi kuguqulwe isisekelo sombuso ukuze uChamisa aphiwe indlu lezinye imfanelo eziphiwa umuntu oyabe esebenze kuhulumende njengempentsheni.
UMongameli Emmerson Mnangagwa kuviki edluleyo uvumile ukuthi kuyakhulunyiswana kodwa kazange agcizelele.
Abazi ngokwenzakala ebandleni le MDC-T bathi inkulumo ezikhona mpela zigoqela ukuphiwa indlu lokunye okungenzelwa uChamisa loyabe ekhokhela amalunga edale lephalamende engowebandla lika Chamisa.
Lokhu kulandlea imbiko ethi eleBhilitane yilo eligqugquzela lokhu ngoba kukhona esisekelweni salelolizwe ukuthi umkhokheli webandla eliphikisayo uyanakekelwa nguhulumende.
Kodwa kukhanya kuzakuba lokungezwani ebandleni le MDC-T nxa uChamisa engemukela okukhulunywayo.
Okwamanje uChamisa kubikwa efake imigoqo yokuthi ilandelwe andubana kuvunyelowane. Sixoxe lengcwethi ecubungula ezombusazwe, uMnu. Bekithemba Mhlanga saqala ngokumbuza ukuthi lokhu kusebenza njani kwele Bhilitane?
“Okwakuqala okuyabe kumele kwenzakale yikuthi sibeleqiniso lokuthi umuntu oyabeethiwa ukhokhela ibandla eliphikisayo isikhundla lesi usiphiwe ephakathi kwedale lephalamende kumbe uyabe ephandle ngoba singakhangela ngapha kweleBhilitane, uyabe elendawo ayimelayo edale,” kutsho uMhlanga.
Kodwa uthi ekhaya okungahlupha yikuthi uChamisa kakho edale.
Uthi kulakho ukwenzakala ukuthi oyabe ezaphiwa imali lokunye abelesiqinisiko sokuthi kathatheki ngoba uyabe engasebenzi ndawonye lohulumende kodwa embhekile ukuthi angaphambuki kuzifiso zikazulu.
