Uhulumende uthi abantu abazaphiwa izicoco zokunanza indima abayidlalayo ekusebenzeleni ilizwe nguMongameli Emmerson Mnangagwa emkhosini wamaqhawe oweHeroes Day ngoMvulo bagoqela umkakhe uNkosikazi Auxillia Mnangagwa.
Izicoco lezi zizaphiwa abantu abaphilayo kanye lasebabhubhayo abavela kunhlangothi ezitshiyeneyo zempilo ezigoqela ezokholo, ezemfundo lezombusazwe.
Kumbiko awethule ngoLwesihlanu, uhulumende uthe uNkosikazi Mnangagwa uzaphiwa umvuzo weOrder of the Star of Zimbabwe Gold ndawonye lomphathintambo wezemidlalo uKirsty Coventry loArchbishop Ezekiel Guti.
Owayengumkhokheli weUniversity of Zimbabwe uWalter Kamba, uPheneas Makhurane, yena owayekhokhela iNational University of Science and Techonogy, uHopewell Sadza labanye bazaphiwa isicoco seOrder of the Star of Zimbabwe Silver.
Abanye abazathola imivuzo etshiyeneyo bagoqela umlobi uMnu Phatisa Nyathi, uCharles Mungosho, intathelizindaba yeZBC uReuben Barew, uMbuya neHanda, uSekuru Kaguvi kanye leNdlovukazi yamaNdebele uQeen Lozikheyi Khumalo.
Facebook Forum