UMongameli Emmerson Mnangagwa ngoMvulo uqhelise isikhathi sokuqiniswa kweziqondiso zokwenqabela ukumemetheka kweCovid-19 ngamanye njalo amaviki amabili.
UMnangagwa uthe lanxa inani lababanjwa lumkhuhlane lehlile phakathi kwamaviki amabili adluleyo, inani lababhubhayo lilokhe liphezulu kakhulu.
Kumbiko awethule kumabonakuhe, uMnangagwa uthe ngokunjalo, ilizwe lizaqhubeka likuzinga lesine lokuqiniswa kweziqondiso lezi, iLockdown Level 4.
Uxwayise njalo uzulu ukuthi elandela limigoqo njalo ehlatshwe ngobunengi ukuze uqedwe lumkhuhlane.
Ugatsha olubona ngezempilakahle luthi umkhuhlane lo ubulale abantu abangamatshumi ayisikhombisa lane, 74, ngeSonto njalo kutholakale abedlula amakhulu amane, 437, belawo.
Lokhu kutsho ukuthi usubulele abantu abazinkulungwane phose ezine selokhe ufike eZimbabwe, 3,900. Asebefunyenwe belawo bonke sebephezu kwenkulungwane ezilikhulu, 116,327.
Abahlatshwe ijekiseni yokuvikela lumkhuhlane ngeSonto bazinkulungwane ezilitshumi lanye, 12,797 kuthi abahlatshwe eyesibili bona bazinkulungwane ezedlula amatshumi amabili, 20,357.