Idale laphezulu ebandleni leZanu PF ele Central Committee selithethe isinqumo sokuthi uMnu. Emmerson Munangagwa sokumele athathe isikhundla sokuba ngunobhala jikelele walo njalo aphethe isikhundla sokuba ngumkhokheli webandla kuze kuyiwe emhlanganweni omkhulu oweExra Ordinary Congress ngenyanga ezayo.
Idale leli lithi uMugabe kumele atshiye umsebenzi wokuba ngumongameli welizwe kusiyafika imini yangoMvulo mhlaka 20 ngoLwezi, 2017.
Engehluleka ukwenzenjalo, ophethe isikhundla sokuba nguChief Whip webandla edale lephalamende, kuzamele aqale udaba lokususwa kwakhe kulandelwa isisekelo sombuso welizwe.
Ngasikhathi sinye, lelidale liphinde laxotsha umsekeli kanobhala jikelele ebandleni, uMnu. Phelekezela Mphoko, obekwa umlandu wokukhankasela ukukhethana ngemihlobo, inkulumo zokuthuka kanye lokusekelana lamasela.
Kuvunyelenwe njalo ukuba sibuyiselwe isikhunda sikamgcinisihlalo webandla, esasike samiswa, kudingwe umuntu ozasigcwalisa.
Okhethwe ukuba akhokhele lumhlangano ngeSonto engumgcinisihlalo, umphathintambo wendaba zasekhaya, engunobhala wezemali ebandleni leli, uMnu. Obert Mpofu, otshengise ukuyijabulela impumela yomhlangano lo.
UMpofu uthi lesi kumele kube yisifundo sokuba akumelanga bekele izinto ziwonakala kubandla leli kuze kuphele isikhathi sokukulungisa.
Bakhona abanye njalo abaxotshiweyo kulelibandla ababalisa omnumzana Ignatious Chombo, Jonathan Moyo, Patrick Zhuwao, Saviour Kasukuwere labanye ngezizatho ezimbalwa.
Kuthethwe isinqumo njalo zokuthi bonke abaxotshwa kulelibandla ngesikhathi kuqhutshwa umhlangano we Congress ngomnyaka ka 2014 babuyiselwe ebandleni lezikhundleni zabo.