UMongameli Emmerson Mnangagwa uhlangane lomphathintambo waseBhilithani obona ngobudlelwano balelolizwe lamazwe eAfrica ngoLwesihlanu wathembisa ukuthi ukhetho oluzayo luzaqhutshwa ngendlela ekhululekileyo.
Isiphathamandla lesi, uNkosikazi Harriett Baldwin, ufike Harare kuliviki njalo uzahlangana leziphathamandla zabamabandla ezombusazwe atshiyeneyo, osomabhizimusi kanye labenhlanganiso ezizimeleyo.
Ekhuluma ngemva komhlangano lo, uNkosikazi Baldwin usole udlakela lwezombusazwe wathi ukhetho oluzayo kumele luqhutshwe ngokuthula.
Amazwi akhe aza ngemva kokutshaywa kukaNkosikazi Joice Mujuru labasekeli bakhe ngabantu abanakanelwa ukuthi ngamalunga eZanu PF eHarare ngoLwesine.
“Siyavumelana lohulumende weZimbabwe ukuthi akumelanga kube lodlakela kuyiwa kukhetho,” kutsho uNkosikazi Baldwin ekhuluma lentathelizindaba.
“Ngibe lethuba lokuhlangana loMongameli Emmerson Mnangagwa yena ogcizelele ukuzimisela ukuqhuba ukhetho olukhululekileyo eZimbabwe lonyaka.”
UNkosikazi Baldwin uveze njalo ukuthi ilizwe lakhe seliphe inhlanganiso ezizimeleyo imali engena kuzigidi ezinhlanu zamapounds ezaziphathisa ekusebenzeni lozulu ukuze avikeleke njalo ilizwe lakhe lizwakale kuyiwa kukhetho.
Ingcwethi kwezombusazwe uMnu Dinizulu Macaphulana utshele iStudio 7 ukuthi ukutshaywa kukaMujuru kuveza sobala ukuthi ukhetho oluzayo kalusoze lube ngolukhululekileyo.
