amalinks wokungena

Breaking News

UEmmerson Mnangagwa Uthi Ufuna Ukuthuthukisa Umnotho weZimbabwe


UMnu. Emmerson Mnangagwa ukhuluma labalandeli bakhe eHarare.

UMnu. Emmerson Mnangagwa, owabaleka eZimbabwe esesaba ukuthi uzabulawa ngowaye ngumongameli, uMnu. Robert Mugabe, uthi isikhathi sesifikile ukuba kulungiswe ilizwe leZimbabwe.

UMnangagwa wethule amazwi la ngoLwesithathu emawofisini ebandla leZanu PF lapho abike ukuthi wafakelwa itshefu waphose wabulawa engakasuki elizweni esanda kuxotshwa umsebenzi.

Uthe uzasebenza gadalala ukwenzela ukuthi kuthuthukiswe ilizwe leZimbabwe kube lemisebenzi kazulu.

Uveze ukuthi ubekhulumisana lebutho ekwele South Africa lapho abalekela khona esexotshwe umsebenzi.

Uthi uMongameli Jacob Zuma, uMnu. Jakaya Gikwete wakwele Tanzania, loMongameli Hage Geingob weNamibia batshayele abantu beZimbabwe ihlombe ngokungachithi igazi ngesikhathi kususwa uMugabe esikhundleni.

Uphinde wathi uzazama ngamandla wonke ukuthi ele Zimbabwe lidlelane lamazwe amanengi ukwenzela ukuthuthukisa umnotho welizwe.

UMnangagwa ukhangelelwe ukuthi uzagcotshwa ukuba ngumongameli ngoLwesihlanu eHarare.

Bakhona abathi umnotho welizwe kawusoze uguquke ngemfanelo njengoba uMnangagwa engaphansi kwebandla leZanu PF eselabhidliza umnotho welizwe.

Facebook Forum

XS
SM
MD
LG