UMongameli Emmerson Mnangagwa ngoMvulo wethule uhlelo lukahulumende olujonge ukusungula imisebenzi ephose ifike kusigidi, 1 million, kuminyaka emihlanu elandelayo.
Kodwa umbuzo omkhulu ngothi luzaphemelela na loluhlelo?
UMnangagwa uthi umhlahlandlela weNational Development Strategy 1 lo yiwo ozalandelwa ngenjongo yokuvuselela umnotho kuze kuyefika umnyaka ka2025.
Uthe phansi kwalumhlahlandlela, uhulumende uzasungula imisebenzi engu760,000, njalo akhulise umnotho ngesilinganiso sokuhlanu ekhulwini, 5 percent.
Wengeze wathi i-inflation layo izakwehla isuka ku471 percent iye phakathi kwe3 le 7 percent.
UMongameli Mnangagwa uthe ukuze lokhu kufezeke, bazaqinisa ingatsha ezigoqela olokulima, olokwenjiwa kwamatshe aligugu, olokulungisa impahla lolokwethekelelwa kwelizwe.
Kodwa ingcwethi kwezenotho uMnu Reggie Shoko uthi lanxa uhlelo lolu lungaze lube lohlonzi, imisebenzi ekhukunywa nguhulumende milutshwana kakhulu ukuthi ivuselele umnotho.
“Ngalapha esikhona, nxa sisithi sifuna ukuthuthukisa umnotho kuyabe kufuze sikhulume ngokuthi sifuna ukusungula imisebenzi engamamiliyoni amabili kumbe amathathu,” kutsho uMnu Shoko.
Unobhala jikelele weZCTU uMnu Japhet Moyo yena usole uhulumende esithi kazange akhulumisane labo njengenhlanganiso yezisebenzi ekubumbeni lumhlahlandlela.
“Luhlelo nje njengezinye inhlelo zikahulumende ezibhalwe kakuhle emaphepheni kodwa ziswele i-implementation kube luhlelo nje oluzathi ngemva kweminyaka emibili, emithathu, sizwe kuthiwa solufakwe eceleni ngoba sokulolunye uhlelo,” kutsho uMnu Moyo.
UMoyo uthe iziloyiso zikahulumende lezi zingaba yizifiso nje zikaThemba loAmkela nanku sokuke kwaba lezinye inhlelo ezifanayo ezigoqela olweZimAsset, ezingaphathisanga ilizwe ngalutho.
“Yizifiso kazaliwa, kodwa kufanele phela kube lenjongo eqondileyo, kube le-strategy, kube le-support njalo ebantwini ukuze phela uhlelo luphumelele,” kugcizelele uMoyo.
UShoko uvumelane loMoyo. Uxwayise uhulumende ukuthi aqinise imizamo yokulwisana lenkohlakalo nxa efuna umnotho uthuthuke.
“Yiyo inking esilayo kuhulumende wethu. Uzowabhala amaphepha amahle kodwa ukuwagcwalisisa kube yinto engani izasihlupha,” kutsho uShoko.
“Ungakhangela njalo kulendaba engani ayibekwanga ngendlala yacaca, indaba ye-corruption, ukuthi sizayiphatha njani ngoba umnotho weZimbabwe ubulawa yi-corruption.”
Usomabhizimusi oyisiphathamandla senhlanganiso yabantu abazisebenzayo iBulawayo Vendors and Traders Association uMnu Aleck Ndlovu uthi zinengi ingatsha uhulumende amele azivuselele kuqala ukuze amaphupho akhe efezeke.
“Isandulelo yikuthi kube lalokhu okuthiwa ngama-factors of production. Kusamele uhulumende aqale akhe i-confidence building, ikakhulu kwezamandla kagetsi kanye lamafutha ezimota kube yizinto ezenelisekayo ukuthi zithengeke,” kutsho uMnu Ndlovu.
“Kumele aphinde alungise futhi udaba lwamanzi ngoba siyakwazi ukuthi kulenkampani okuthiwa yiUnited Refineries kanye lezinye esezivaliwe ngenxa yokuswelakala kwamanzi ikakhulu koBulawayo.”
UNdlovu uxwayise njalo uhulumende ukuthi aphathise abantu abazisebenzayo ngemali ukuze baqinise amabhizimusi abo.
Uhlelo lweNational Development Strategy 1 lolu lwelama olweTransitional Stabilization Program lona olusolwa ngabanye besithi alusizanga ngalutho.
Kodwa uhulumende uthi lwaphumelela loluhlelo ngoba lwenelisa ukuqeda ukukwela mahlayana kwentengo yezinto lwaqinisa njalo ledola leZimbabwe.
