Amalunga eMDC edale lephalamende ngoLwesithathu athwalise nzima umsekeli kaMongameli welizwe uMnu Emmerson Mnangagwa ngokunyamalala kukaItai Dzamara esithi uhulumende kenzi konke okusemandleni akhe ukumdinga.
Omunye wamalunga la, uNkosazana Thokozani Khupe utshele uMnangagwa ukuthi nxa uhulumende esazi ukuthi uDzamara ungaphi, kumele amphendukise kungelani lokuthi uyaphila kumbe hatshi.
Kodwa uMnu Mnangagwa uthe uhulumende kalalwazi ngokuthi waya ngaphi uDzamara, njalo uthe wenza konke akwenelisayo ukumdinga.
Ugcizelele wathi nxa bekhona abakwaziyo okungaba kwenzakala kuDzamara, yena owayedume ngokusola umbuso kaMongameli Mugabe, kumele bazise uhulumende.
Kodwa ingcwethi kwezombusazwe uMnu Brilliant Mhlanga uthe lokhu akusoze kwenzakale ngoba uhulumende nguye yedwa okwaziyo ukuthi uDzamara waya ngapho.
"Eqinisweni akulalutho olwenziwa nguhulumende esingathi yindlela yokumdinga uDzamara. Vele abalandaba lakho," kutsho uMnu Mhlanga.
