amalinks wokungena

Breaking News

UMnangagwa Uvula Ibhanga Elizapha Izikwelede Zamabhizimusi Abasakhulayo


Imali

Umongameli Emmerson Mnangagwa uvule okusemthethweni ibhanga labatsha elithiwa Empower Bank namhlanje, ngenjongo yokunika abasakhulayo ithuba lokuthi benelise ukukhweleda izimali zokusungula awabo amabhizimusi ngesikhathi amanye amabhanga ebavalela phandle.

Ibhanga leli livule iminyango ngesikhwama sezigidi ezilitshumi lambili zamadola - $12 million, ezakwebolekwa abatsha abalemicabango yokusungula imisebenzi yokuziphilisa ngalezi zikhathi zokungatholakali kwemisebenzi elizweni. Abasakhulayo bakhangelelwe ukuhiwa lezi mali kodwa baphiwe isikhathi sokuyibuyisela kancane kancane ukuze isikhwama sokukhweledisa abanye sibe lokhu sikhula.

Ekhuluma emkhosini wokusungula ibhanga leli umongameli Emmerson Mnangagwa ukhuthaze abatsha ukuthi bazinikele ukubisela imali abazikweledayo ukuze abanye abangemuva kwabo labo bathole.

“Ubugwelegwele loba ngayiphi indlela abula ndawo kuleli ibhanga. Kubo bonke abazathola izimali ebhanga leli sibakhuthaza ukuthi bazithobe babe ngabantu abazabisela leyo mali. Siyakhumbula ukuthi ngemuva le, sikesaba lohlelo lokuthuthukisa abatsha, akula mali eyabuyayo. Khathesi into seziguqukile , kufanele sibhadhale imali esiziphiweyo,” kutsho uMnangagwa

Uhulumende uke wasungula uhlelo olufanayo iminyaka edluleyo olwa lukhangelane lokukweledisa abatsha kodwa lokhu kwaphetha kubi ngemva kokuba inengi labatsha lingenelisanga ukubisela lezo mali njalo kwaba lenkohlakalo ekutholeni lezomali ziphiwa ngokuthi ungowebandla liphi.

Omunye wabatsha obekhona kusungulwa leli bhanga u Patience Maringosi uthi ukhangelele ukuba leli bhanga lizaqhuba umsebenzi ngcono wokutholisa abatsha imali ikakhulu kunengi elingela mabhuku okugcinela imali emabhanga okuyinto ekade ihlupha ukuthi bathole iizikhwelede.

“Thina njengentsha yeZimbabwe siyathaba kakhulu ngokwenziwe nguPresident wethu uMnangagwa ukuthi akwanise ukuthi asivulele ibank lethu njengabatsha. Siyathaba kakhulu ukuthi lathi sekusineke amathuba ukuthi sikwanise ukuthi sizisebenzele sisiyaphiwa amaloni njalo siyathemba ukuthi amaloni la azabe engakhethi ukuthi bazabe benika abantu bayiphi iparty njengalokho esasikubona ngesikhathi sika president Mugabe , silethemba lokuthi wonke umuntu eZimbabwe uzabe ekwanisa ukuthi athole imali yeloni ngoba nxa sikhangele khathesi elizweni lethu akula misebenzi kodwa ngenxa yalokhu esikwenzelwe ngupresident wethu sithanda ukuthi sibonge ngoba lathi njengentsha siyazibona lathi ngelinye ilanga sivuka sisiyazisebenzela. Siyabonga upresident siyabonga,” kutsho uMaringosi.

Uhulumende usebenza lebhanga elikhulu lelizwe, eleReserve Bank of Zimbabwe ekuthini umuntu wonke elizweni enelise ukuvula ibhuku lokulondoloza imali athole icard lebhanga lokuthenga ngalo ngesikhathi ilizwe libhekane lodubo lokusilela kwemali emabhanga.

Ingcwethi ecubungula ezombusazwe uMnu Richard Mahomva uthi laloba kulinyathelo elihle ukusungulwa kwaleli bhanga okumkhathazayo yisikhathi sokuvulwa kwalo, okungabe kuyindlela yokuncenga ivoti yabatsha.

“Leli inyathela linyathela elihle elithathwe nguhulumende kodwa kusuka kumangalise ukuthi njengoba inyathela lilihle kangaka ukuthi ilizwelona livele kalila mali thina sisungule amabhanga amatsha yikho ke kuletha imibuzo mhlawumbe kungabe kuyindlela yokudinga amavoti kodwa ke okuqakathekileyo yikuthi ngaphezulu kwakho konke uhulumende ayenelise ukuthi leli ibhanga lithuthukise intsha njalo lingabi lenketho , yikho esingabe sikukhangelele ngokusungulwa kwaleli ibhanga,” kutsho uMahomva.

Lesi sehlakalo sibuya ngemva kwamaviki amabili, umongameli Mnangagwa esungule ibhanga labesifazana elizabe likhweledisa omama abafuna ukusungula inhlelo zokuzithuthukisa.

Lakho okubonwa ngabanengi njengendlela kaMnangagwa yokudinga amavoti kwabesifazana labatsha njengoba kwenzakele sekusele amaviki ambalwa nje usuku lokhetho ukuthi lufike.

please wait

No media source currently available

0:00 0:00:20 0:00

Facebook Forum

XS
SM
MD
LG