UMongameli Emmerson Mnangagwa ukhangelelwe ukwethula umbiko wakhe emhlanganweni weCOP26 eScotland, kweleUnited Kingdom ngoLwesibili ngemva kokuhlangana leziphathamandla zeBhilithani lezeEuropean Union izolo.
Umhlangano lo uvulwe ngumholi weBhilithani uMnu Boris Johnson yena obonakale eqhawula uMnangagwa bebingelelana.
Umsakazo weZBC ubike ukuba uMnangagwa uhlangane lomphathintambo obona ngobudlelwano beBhilithani lamazwe aseAfrica uNkosikazi Victoria Graceford kanye lomkhokheli weEuropen Council uMnu Charles Michel.
Esiya emhlanganweni lo uMnangagwa waveza ukuthi uBoris wathembisa ukuthi balakho ukuhlangana bexoxisane ngobudlelwano phakathi kwamazwe womabili.
Yena uMnangagwa ukufakazile enkundleni yeTwitter ukuthi uhlangane loMichel njalo wabonga ukwamukelwa kwakhe nguBoris lonobhala jikelele weUnited Nations uMnu Antonio Guterres esithi lokhu kuveza ukuthi ukukhulumisana phakathi kweZimbabwe lamanye amazwe kuyaphumelela.
Kumbiko wakhe namuhla uMnangagwa ukhangelelwe ukuveza amanyathelo athathwa yiZimbabwe emizameni yokulwisana lokuguquka komkhathi lokuthi ilizwe lakhe liphazanyiswa njani yilinguquko.
UMongameli weMelika uMnu Joe Biden loGuterres bakhulume izolo bakhuthaza amazwe omhlaba ukuthi ebambe iqhaza alwisane laloludaba.
Ingcwethi kwezombusazwe uDr Brilliant Mhlanga utshele iStudio 7 ukuthi kaboni ukuhlangana kukaMnangagwa leziphathamandla zeBhilithani lezeEuropean Union kukuguqula indlela amazwe la adlelana ngayo leZimbabwe okwamanje.
Kodwa abezanu PF bona bathi uhambo lukaMnangagwa eScotland luveza sobala ukuthi eleBhilithani lamazwe aseEurope azimisele ukusebenzelana loMnagagwa.