Intshantshu zomdlalo wenguqu kwele Zimbabwe iqembu le FC Platinum lifinyelele kusigaba sezibaya esomncintiswano wokudinga intshantshu zezwekazi lase Africa ngemva kokunqoba ele AS Otoho elase Congo Brazzaville nge 2 ka 1 kusentshenziswa umthetho we away goals rule kuthi ele Orlando Pirates lona litshaye ele African Stars elase Namibia nge 1 ka nya ikanti ele Mamelodi Sundowns lona libhuqe ele Al Ahli Benghazi elase Libya nge 4 ka nya.
Ngokwakuqala ukuba iqembu le FC Platinum lifinyelele kusigaba sezibaya selokhu liqale ukuphatheka kumncintiswano wokudinga intshantshu zezwekazi lase Africa njalo umqeqetshi walo uNorman Mapeza utshayele ihlombe abafana bakhe ngokuphumelela abakwenzileyo lokhu.
Iqembu le Mamelodi Sundowns lele Orlando Pirates aseke asiphakamisa isicoco esokuba zintshantshu zezwekazi lase Africa kodwa ngokwakuqala ukuba kube lamaqembu amabili aphuma elizweni le South Africa kusigaba sezibaya salo umncintiswano.
Amanye amazwe amelwe ngamaqembu amabili ngabalisa ele Tunisia elimelwe yi Esperance kanye le Club Africain, ele Egypt elimelwe yi Al Ahly kanye le Ismaily, ele Algeria elimelwe yi JS Saoura kanye le CS Constantine kanye lele Democratic Republic of Congo elimelwe yi AS Vita kanye le TP Mazembe.
Amanye amaqembu afinyelele kusigaba sezibaya ngabalisa ele Wydad Casablanca elase Morocco, ele Simba SC elase Tanzania, ele Horoya AC elase Guinea, ele Asec Mimosas elase Ivory Coast kanye lele Lobi Stars elase Nigeria.
Uhlelo lokuba amaqembu azadlala njani kumidlalo yezibaya luzaqhutshwa mhla zingamatshumi amabili lethoba minwe mbili kuyonale inyanga ka Mpalakazi.
