amalinks wokungena

Breaking News

Umongameli Mnangagwa Uthembisa Umbuso Wezabelo weDevolution


Mnangagwa Gwanda Rally
Mnangagwa Gwanda Rally

UMongameli Emmerson Mnangagwa uphindele eGwanda okwakuqala selokhu wasuka kulelo dolobho ethwalelwa esibhedlela ngemva kokufakelwa itshefu nyakenye, esiza emhlanganweni wokukhankasela ukuthola usekelo kukhetho lwalonyaka.

Umgcinisihlalo weZanu PF eZansi yemaNdebeleni uMnu Rabelani Choeni ukhuthaze uMongameli ukuthi akhuze uvalo azizwe esekhaya ngesikhathi efika enkundleni yePelandaba Stadium lapho aphosa wafela khona ngemva kokufakelwa itshefu nyakenye kusabusa Umnumzana Robert Mugabe.

Umhlangano kaMongameli Mnangagwa oweRally eyeGwanda
Umhlangano kaMongameli Mnangagwa oweRally eyeGwanda


Lapho esukuma Ukuthi akhulume uMnangagwa uthe akalasikhwili labantu bemaNdebeleni ngoba kungayisibo abamfakelayo itshefu.

Ukwanda kwabantu abancintisa kukhetho lokudinga uMongameli uMnangagwa uthi kuveza obala ukuthi sekulombuso wentando kazulu elizweni. Wathembisa ukuba ibandla lakhe lizaletha umbuso wezabelo oweDevolution ngemva kokunqoba kukhetho. Uthi njalo yena lequla lakhe baphakathi kokuthuthukisa ezomnotho ukuze izazalwane zakuleli zithole umsebenzi njalo ziphile impilo engcono.

Abalandeli beZanu PF ubakhuthaze ukuthi baqhube imikhankaso yabo ngokuthula ukuze impumela yokhetho yamukelwe kungela kuthandabuza.
Amazwi akhe agcizelele ngumsekeli wakhe uMnu. Kembo Mohadi othe eleZimbabwe selisezandleni eziqondileyo.

Inkoomo zohlelo olweCommand Livestock
Inkoomo zohlelo olweCommand Livestock

UMongameli Mnangagwa uqale wanikeza abalimi abedlula ikhulu lengxenye 151 inkomo ezifika phose amakhulu ayisikhombisa 660 phansi kohlelo lukhahulumende olweCommand Livestock.
Induna uMasendu ubonge uhulumende ngaloluhlelo esithi luzathuthukisa impilo zabantu balesisabelo.

Inengi ebelikulumhlangano lithi inhlupho ezibhekane lozulu weZansi yemaNdebeleni yikuswelakala kwenhlelo zentuthuko njalo akula magagasi okuthola umsakazo owe ZBC okudala ukuthi inengi kulumhlubulo lilale iStudio 7 leminye imisakazo yemazweni angomakhelwane.

please wait

No media source currently available

0:00 0:03:56 0:00
XS
SM
MD
LG