amalinks wokungena

Breaking News

Umongameli Mugabe loKhama Bananza Insuku Zabo Zokuzalwa


Umongameli Ian Khama lomongameli Robert Mugabe

Ngesikhathi umongameli Robert Mugabe esenzelwa idili lamadola phose isigidi, omunye wakhe wele Botswana umongameli Ian Khama uthakazelele ilanga lakhe lokuzalwa ngokuvakatshela ejele yeGaborone lapho ahlangane labanye abeZimbabwe.

UKhama ufikise iminyaka yokuzalwa engamatshumi ayisithupha lantathu-63, ngoMgqibelo, kukanti umongameli Robert Mugabe yena wenelise iminyaka engamatshumi athoba munwe munye lambili (92) ngeviki edluleyo.

Kodwa ababili laba bathakazelele amalanga abo okuzalwa ngendlela ezitshiyeneyo, lapho umongameli Khama ethethe isikhathi sakhe evakatshela abase jele eGaborone.

Umongameli Khama, udle ikhekhe lakhe lelanga lokuzalwa lezibotshwa zeZimbabwe esithi yindlela afisela ngayo umongameli Mugabe impilo ende.

Ngaphetsheya komngcele, emanxiweni awe Great Zimbabwe eMasvingo, umongameli Mugabe ube buthanelwe zinkulungwane zabantu kudili elibikwa libe lendleko engaba phose isigidi ezilikhulu ukuthakazelela ilanga lakhe.

Umongameli Mugabe uthe isikhathi ukuchothoza ukulwisana okuphakathi kwebandla lakhe leZanu PF.

Konke lokhu kusenzeka elizweni lapho inengi libhekane lendlala kanye lokoma komumo womnotho.

AbeBotswana bona bathi bayajabula ukuba lomongameli ofana lo Ian Khama ongadlalisi imali kumadili angancedi uzulu jikelele.

Umnunzana Mpho Mathala uthi okwenziwe ngumongameli Khama kuyabukeka esola idili elenziwe eZimbabwe.

Kuhle okwenziwe ngumongameli ukuyavakatshela izibotshwa, njalo uvakatshele abantu abahluphekayo engasebenzisanga imali enengi.

Akufani lesikuzwa kusenzakala eZimbabwe ukuthi kusetshenziswe imali enengi.

Kukanti owe Zimbabwe umnunzana Joseph Mthombeni laye ubone kuyindlela yokuba ngumongameli wabantu okwenziwe ngumongameli Khama kukanti engalamazwi anambithekayo ngomongameli Mugabe.

Umongameli Seretse Khama Ian Khama weleBotswana
Umongameli Seretse Khama Ian Khama weleBotswana

'Ayisikho kwakuqala umongameli Khama etshingisa ukuthi ungumuntu wabantu ngoba ebonakala njalo nje ehlanganela labantukazana, kukanti okwenzakala kithi yikuchitha imali inengi lisebunzimeni'.

Ekufikeni ejele yeGaborone Central, umongameli Khama udle ikhekhe lazo zonke izibotshwa ngaphambi kokuba asike elinye alidle lezibotshwa zeZimbabwe ezisejele le esithi lelo ngelokuthakazelela ilanga lokuzalwa kukamongameli Mugabe.

UMugabe loKhama bajabulela ilanga lokuzalwa ngendlela ezitshiyeneyo
please wait

No media source currently available

0:00 0:02:02 0:00
Lapho esitholakala khona

XS
SM
MD
LG