amalinks wokungena

Breaking News

UMongameli Cyril Ramaphosa Uvotelwa Ngabedale Lephalamende


UMongameli Cyril Ramaphosa efungiswa ukuqala umsebenzi ngemva kokukhethwa kwakhe ngamalunga edale.

UMongameli Cyril Ramaphosa unqobe kukhetho lapho avotelwe ngamalunga edale lephalamende kungela ophikisayo okuyinto elethe injabulo lompululu omkhulu kulelidale. URamaphosa ukhethwe ngoLwesithathu ngamalunga edale lephalamende.

Isisekelo sombuso weleSouth Africa sithi uzulu uvotela amalunga edale lephalamende. Ibandla elithola amavoti amanengi yilo eliba libandla elibusayo. Emhlanganweni wabo wakuqala ephalamende abesekhethake umongameli.

Amalunga edale lephalamende entsha lawo ahle agcotshwa lamhlanje ukuqala umsebenzi engakakhethi umongameli. I ANC yiyo elamalunga amanengi kuleli dale ilandelwa yiDemocratic Alliance, kuze i Economic Freedom Fighters bese kusiza amabandla amancane.

Ezikhundleni zedale lephalamende ezibalisa uSomlomo lomsekeli wakhe iANC yiyo njalo enqobileyo.

Nomanje izizalwane zeZimbabwe zingaphathekanga ekuvoteni okusanda kwenziwa, ukuthi yiliphi ibandla elibusayo, ngubani umongameli kanye losomlomo wephalamende, kuqakatheke kakhulu ngoba kuthinta impilo yabo yansukuzonke elizweni.

Umgcinisihlalo weZimbabwe Community in South Africa umnumnzana Ngqabutho Mabhena uthi ukukhethwa kukaRamaphosa kubatshiya belethemba lokuthi ezomnotho zizathuthuka baqhubeke besebenza.

“Siyakwazike ukuthi lapha eSouth Africa kulezizalwane zaseZimbabwe ezihlala lapha eSouth Africa lazo ezihlutshwa ngumsebenzi. Sicabanga ukuthi ukuba namathuba emsebenzi eSouth Africa kuzakwenza lezizalwane ezilapha eSouth Africa ukuthi zithole umsebenzi iakhulu lezi izizalwane ezivunyelweyo ukuthi zihlale eSouth Africa”

Esinye isizalwane seZimbabwe umnumnzana Greatman Mkhwebu uthi bebesesabela ukuthi I ANC ingakhutha ugatsha kuzangena ibandla elizonda abakwamanye amazwe.

“Mina ngizizwa ngilokujabula okukhulu lethemba elikhulu okokuthi manje lamaphatho ami asehleli phansi. Njalo ngilokuzethemba okukhulu ukuthi inhlelo zami ebengilokwethuka ukuthi mangabe umbuso uthethwe liqembu eliphikisayo, vele bese ngisazi kahle ukuthi kuphelile ngathi siyaxotshwa lapha sibuyele ekuhluphekeni. Ngiyamthanda lobaba njalo ngiyamthemba uRamaphosa”

Kusenjalo kulamalunga aleli dale angawebandla leANC agoqela obengumsekeli kamnumnzana Ramaphosa kungakaqhutshwa ukhetho umnumnzana David Mabuza, abangasagcotshwanga ngoba besithi bafuna ukugeza amagama abo kunsolo zenkohlakalo ababhekane lazo.
Ezinye ingcwethi zithike lesi yisibonelo sokuthi uhulumende kaRamaphosa akazukuvumela inkohlakalo okulinyathelo abathi liqakatheke kakhulu kuntuthuko yezomnotho.

Udaba lokukhethwa kukaMongameli Cyril Ramaphosa siluphiwa nguBenedict Nhlapho
please wait

No media source currently available

0:00 0:03:05 0:00

Facebook Forum

XS
SM
MD
LG