amalinks wokungena

Breaking News

UMongameli Mnangagwa Ulubhekisa KweleTanzania


Umongameli John Pombe Magufuli tefungiswa ukuthatha intambo zombuso okwehlandla lesibili

Umongameli Emmerson Mnangagwa, ofike kweleTanzania ngoLwesithathu, umanyane leyinye inkokheli yomhlaba emkhosini wokufungiswa kukaMongameli John Magufuli ukuqalisa umsebenzi wokubusa lelozwe okwehlandla lesibili ngemva kokunqoba kukhetho lukamongameli olwenziwe ngeviki edluleyo.

UMnangagwa obekhatshwe ngumpathintambo wakhe wezobudlelwano beZimbabwe lamanye amazwe womhlaba uMnu. Sibusiso Moyo, wamukele esilindweni sendizamtshina ese Julius Nyerere International Airport eDar es Salaam ngumeli weZimbabwe kwele Tanzania, uLieutenant-General (retired) Anselem Sanyatwe.

Umongameli Magufuli, webandla le Chama Cha Mapinduzi, eliyilo eselibuse kulelozwe kusukela lithola uzibuse embusweni weleBhilithani ngomnyaka ka1961, wenelise ukuthola isilinganiso samavoti edlula amatshumi athobaminwemibili ekhulwini – 84%, enqoba obe ngemuva kwakhe kulabo abancintisileyo, uMnu. Tundu Lissu webandla leChadema Party, othole isilinganiso sokulitshumi lantathu ekhulwini-13%.

Iqula labakade beyebona lolukhetho luqhutshwa abomanyano weSADC kanye lowe East African Community bancome ukuqhutshwa kokhetho lolu besithi lwenziwe ngokuthula.

UMnangagwa uthumele amazwi wokwenzela amhlophe uMagufuli ngokuvotelwa kwakhe ukubuyela embusweni okweminye iminyaka emihlanu elandelayo.

Eloba ekhansini lakhe lenkundleni yokuxhumana eyebulenjini eyeTwitter, uMnangagwa uthe ukunqoba kukaMagufuli kuzakwenza ukuba ubudlelwano obuhle obuvele bukhona phakathi kwamazwe womabili buqhubekele phambili buqina.

Facebook Forum

XS
SM
MD
LG